Ish-ministri i Drejtësisë, Ylli Manjani, përmes një postimi në rrjet shkruan se direktiva e BE “Follow the money”, pra ndiq paranë, ka krejt tjetër kuptim nga ligji i Anti-KÇK që mbështet edhe Ambasadori Luigi Sorecca, i deleguari i BE.
Sipas ish-ministrit, t’a quash “anti-KÇK-në” si zbatim të direktivës së BE duhet të kesh një problem shumë të madh me BE, ose i paaftë për të kuptuar ç’po ndodh në Shqipëri.
Në këtë kuadër, Manjani i sugjeroj Sorecas ta prezantojë në Itali këtë ligjin e KÇK që mbështet këtu.
Madje, ish-ministri shkruan se as në Maqedoni e Kosovë, BE nuk pranoi të bëhej kjo katrahura jonë, që e mbështetën të deleguarit e saj.
“Direktiva “follow the money” parakupton një punë të mirfillte investigative, ku duke ndjekur fillin e transaksioneve financiare të cilat të çojnë tek personat e vërtetë që i kryejnë ato.
Pra ideja është që nga paraja të shkohet tek personi, me shumë gjasë krimineli.
Kurse anti-KÇK, fillon nga personi/krimineli, tek pasuria e tij. Pa asnjë punë hetimore, thjesht shihet kush ka qenë apo është në burg i çon OFeLi-ja letrën. Në disa raste OFL ndërhyn edhe në proçese të çelura nga drejtësia”, shkruan Manjani.
Në vijim, ai shprehet se nëse direktiva e BE kërkon shtet, procedurë dhe inteligjencë, anti-KÇK kërkon thjesht policë që të veprojnë me llogjikën e të fortit për të Kapur ç’a të Ketë mbetur. Njësoj si banditët kur plaçkisin viktimat e tyre.
“Direktiva e BE kërkon proces të rregullt gjyqsor, që do të thotë që është drejtësia ajo që e udhëheq luftën kundër krimit. Anti-KÇK është drejtësi paralele, që funksionion sipas rregullave të bosit dhe jo kushtetutës e ligjit.
Vini re, akti normativ nxjerr komplet jashtë funksioni rendin juridik e kushtetues. Prandaj policisë, fjala vjen, nuk i bën përshtypje parimi i gjësë së gjykuar.
Direktiva e BE parakupton që policia është nën drejtësinë. Kurse me anti-KÇK, policia e tërheq për hunde atë pak drejtësi që ka ngelur”, shkruan Manjani.
