Takimi Kim-Ahmetaj/ Qytetarët-ambasadores: Ke shtrënguar duart me “peshkun e madh” të korrupsionit

Ambasadorja ndryshoi, megjithatë pakënaqësitë e qytetarëve ndaj qëndrimeve të Ambasadës Amerikane mbeten…

Këtë të premte, në faqen zyrtare në FB të Ambasadës Amerikane në Tiranë, është pasqyruar takimi mes diplomates Yuri Kim dhe Arben Ahemtajt, ministrit të Shtetit për Rindërtimin. “Ambasadorja Kim u takua me Ministrin për Rindërtimin Arben Ahmetaj më 13 shkurt. Ata diskutuan rëndësinë e përdorimit me efikasitet të burimeve në ndihmë të atyre që u prekën nga tërmeti tragjik i nëntorit. Ambasadorja nënvizoi përgjegjësinë e qeverisë për të siguruar transparencë dhe llogaridhënie për fondet e përdorura për rindërtim”, shkruhet në postimin e shoqëruar me një foto ku Kim dhe Ahmetaj pozojnë të qeshur duke shtrënguar duart.

Qytetarëve megjithatë, takimi i ka lënë përshtypje jo të mirë. Komentet negative dhe ironike nuk janë kursyer në postimin e ambasadës.

LEXO EDHE  Nga 1000 deri në 2500 euro për të shkuar në vendet e BE/ Zbardhet skema, arrestohen 5 persona

Në komente, qytetarët e quajnë ministrin “grabitës, hajdut e kriminel”. Dikush i shkruan se Arben Ahmetaj, në qendër të akuzave për korrupsion galopant nga opozita në kohën që drejtonte Ministrinë e Financave, “është peshku i madh për të cilin fliste Donald Lu”, paraardhësi i saj. Një tjetër shkruan se ambasadorja “ka dy jave që shtrëngon duart me përfaqësuesit më të lartë të mafies komuniste shqiptare”, ndërsa të tjerë i kërkojnë ti “shpëtojë” nga kryeministri Edi Rama.

Nuk mungojnë as komentet ironike. “Edhe Shullazi ka ngel pa e taku”, shkruan një qytetar. “Turi në vijim … mbyllja, qershia mbi tortë, foto me Nexhmije Hoxhën”, është një tjetër koment.