Presidenti Ilir Meta ka zhvilluar sot një takim me një delegacion të Komisionit të Venecias, që ka ardhur në Shqipëri, lidhur me procedurat e zgjedhjes së anëtarëve të Gjykatës Kushtetuese.
Vizita e delegacionit të Venecias zhvillohet një ditë pasi Kuvendi votoi ndryshimet në një prej ligjeve të Reformës në Drejtësi, lidhur me procedurat për betimin e anëtarëve të Gjykatës Kushtetuese dhe asaj të Lartë.
Ndryshimet parashikojnë se një anëtar mund të mos betohet para Presidentit, ndërsa mazhoranca e argumenton këtë nismë me zhbllokimin e ngërçeve ligjore, si në rastin e Artya Vorpsit, e cila nuk u thirr për t’u betuar nga Presidenti. Ky i fundit në anën tjetër e ka cilësuar këtë ndryshim si anti-Kushtetues.
Pikërisht lidhur me problematikat e krijuara, sot delegacioni i Venecias nisi takimet me Presidentin, për të vijuar edhe me të tjerë aktorë politikë, ndërsa më pas pritet të jepen edhe opinionet lidhur me procedurat dhe situatën.
Gjatë takimit të zhvilluar në Presidencë, Meta në një moment është ngritur në këmbë dhe ka deklaruar “po i lë gjysmën e Presidencës, Komisionit të Venecias këtu. Ne nuk kemi Gjykatë Kushtetuese, nuk kemi Gjykatë të Lartë…”.
Deklarata e Metës shkaktoi të qeshura te të pranishmit.
