Zv.ministri i Mbrojtjes, Petro Koçi, i është përgjigjur Presidentit Ilir Meta, pas deklaratave të këtij të fundit, i cili i bëri thirrje Parlamentit të vetë shpërndahet.
Koçi nuk ka nguruar që t’a krahasojë gjuhën e Metës me atë të të fortëve që ka në fokus të punës OFL.
“Edhe Metës i kanë thënë shpesh që të vetëdorëzohet dhe nuk e ka bërë. Deklaratat e presidentit janë deklarata me një gjuhë që zakonisht e kanë të fortët e lagjes ose këta të fortët që ka në objekt pune OFL. Kjo është gjuhë dhune, gjuhë rezistence militare gjë që nuk i shkon një Presidenti Republike”, tha Koçi në Vizion +.
Madje zv.ministri i Ramës ka komentuar edhe deklaratat e Metës, që e krahasoi Presidencën me një kala.
“Edhe kur thotë kala, Presidenca nuk është organizatë, është një institucion që ka Presidenti i Republikës. Nuk është një institucion kolektiv. Ata të tjerët janë punonjës të zakonshëm të shtetit. Zoti Meta kështu i mendon gjërat, gjithmonë e mendon veten pjesë të një organizate”, tha Koçi.
