Nga Boldnews.al
Nuk ka më “shtet ligjor” mbrojtje e të drejtave të njeriut dhe ndarje institucionesh. Sot të gjitha jënë në duart e zgjatura të kryeministrit Edi Rama, duke nisur nga Parlamenti, institucionet e reja të drejtësisë dhe përfunduar në Shërbimin Informativ Shtetëror.
Praktikisht, një shtet i kontrolluar nga pushteti ekzekutiv, ku kryeministri tashmë nuk po njeh asnjë limit ndalje, duke e shtyrë sipas qejftit kufirin ndarës mes ekzekutivit dhe institucioneve të tjera të pavarura në letra.
Më e fundit nismë është e një grupi deputetësh në Parlament, të cilët kërkojnë ndryshime të Kodit Penal, duke i dhënë superkompetenca policisë dhe drejtuesve të saj, që për ligj njohin vetëm Rilindjen. Në të ashtëquajtur nismën e “Ligjit Anti KÇK”, policia pritet që të kthehet në kohën e Sigurimit të Shtetit, duke pasur të drejtën e përgjimeve edhe pa vendim gjykate.
Për këtë nismë është propozuar konkretisht kur në nenin 131 të draftit që me gjasë pritet të marrë edhe votat e opozitës së vetëshpallur thuhet se: “Gjatë veprimtarisë informative-gjurmuese ose të një procedimi policor, me qëllim parandalimin dhe zbulimin e veprave penale të autorëve të tyre, Policia e Shtetit përdor këto masa të veçanta: Përgjimin ambiental të bisedave të personave në ambiente publike, si dhe në mjete të transportit publik; Përdorimin e pajisjeve teknike për fotografimin, filmimin ose me video të personave në vende publike dhe përdorimin e pajisjeve gjurmuese të vendndodhjes; Përgjimin e bisedave telefonike ose telekomunikimeve, që rregullohet me ligj të veçantë”.
Mjafton kjo klauzolë që të nisë një “gjueti shtrigash” me punonjës policie të shtetit me kufje në vesh që të përgjojnë jo vetëm elementë të krimit, por edhe kundërshtarë të Rilindjes. Çështja e përgjimeve të paligjshme është një histori e hershme në vendin tonë, veçanërisht në kohën kur Partia Socialiste mori drejtimin. Për pajisjen përgjuese “IMC Chatcher” pati një proces penal, ku u mor edhe masa e pezullimit nga detyra të ish-kreut të Policisë së Shtetit Haki Çako.
Ajo pajisje ishte sjellë nga Italia nën pretekstin e “trajnimit” të efektivëve të policisë, por dyshohet se u përdor për qëllime të tjera, duke mbajtur nën vëzhgim dhe përgjim kundërshtarët politik të qeverisë, apo edhe të ish-ministrit të brendshëm Saimir Tahiri.
Tashmë nuk do ketë më pajisje ilegale, por me ligjin e Rilindjes rrezikon që vendi të kalojë në rikthimin e një strukture famëkeqe siç ishte Sigurimi i Shtetit.
