Partia Demokratike ka përsëritur propozimin për krijimin e një qeverie kujdestare, e cila do të merret me organizimin dhe mbarëvajtjen e procesit zgjedhor, duke garantuar votën e shqiptarëve.
Oerd Bylykbashi tha se kjo qeveri kujdestare duhet të përbëhet nga emra me integritet që do të garantojnë procesin.
Bylykbashi tha se kërkohet një qeveri neutrale, me figura me integritet, që duhet të garantojnë zgjedhjet dhe votat e shqiptarëve.
“Pa një qeveri kujdestare, të gjitha masat e tjera për garantimin e lirisë, sigurisë dhe paprekshmërisë së votës, bëhen të pavlera”, u shpreh Bylykbashi, që është dhe bashkëdrejtues i Komitetit Politik për reformën zgjedhore.
Ish-deputeti përjashtoi mundësinë e një qeverie të përbashkët mes mazhorancës dhe opozitës së bashkuar, ndërsa vuri theksin te një qeveri kujdestare që do t’i japë fund abuzimit me fondet shtetërore apo aseteve shtetërore nga ai që është në qeverisje.
Bylykbashi akuzoi Ramën si një kryeministër që shkel çdo standard dhe që nuk mund të garantojë zgjedhje të lira.
