Ministri i Jashtëm i Turqisë, Mevlut Çavuşoğlu, ka kërkuar sot bashkëpunimin e qeverisë shqiptare për kthimin e gulenistëve nga Shqipëria në Turqi.
Në konferencën për mediat, bashkë me ministrin e Jashtëm në detyrë, Gent Cakaj, Çavuşoğlu ka ripërsëritur rrezikun që i kanoset vendit nga organizata FETO.
“Do të jemi më aktivë dhe presim mbështetjen e palës shqiptare, në bashkëpunim tepër të ngushtë me një vend vëlla si Shqipëria.
FETO nuk është kërcënim vetëm për Turqinë por edhe vendet ku ndodhet, duhet ta dinë mirë se FETO në disa vende është një organizatë që kontrollohet nga shërbimet sekrete të disa vendeve. Ne i kemi shpjeguar vëllezërve tanë për rrezikun dhe kërcënimin edhe në takimet qe kemi pasur me kryeministrin Rama dhe Gentin, se çfarë kërcënimi përfaqëson FETO për Shqipërinë”, tha ai duke shtuar se vizita e tij është përgatitore për vizitën që do të realizojë Presidenti Erdogan në Tiranë.
Ai u shpreh se Shqipëria ka bërë disa hapa përpara në drejtim të kthimit të anëtarëve të FETO-s, por presim të vijojmë më tej.
“Nuk dëshirojmë që Shqipëria të jetë portë sigurie për FETO-n”, tha ai.
Më 1 janar 2020, autoritetet shqiptare dërguan në Turqi, kundër vullnetit të tij, mësuesin Harun Çalik, i akuzuar nga Turqia si pjesë e organizatës FETO. Ndërkohë një tjetër shtetas turk ndodhet në burgjet shqiptare dhe rrezikon ekstradimin drejt Turqisë.
