Nënkryetari i LSI-së, Petrit Vasili, tha se operacioni i OFL është një alibi për bashkëpunimin e rilindjes me krimin.
Duke reaguar ndaj fjalimit të Kryeministrit Edi Rama në Kuvend, Vasili tha se ai mashtroi publikisht dhe në mënyrën më të rëndë shqiptarët lidhur me paketën “KÇK” dhe lidhur me veprimet që i kishin lidhur gjoja duart atij për të vepruar kundra krimit e për të bërë detyrën e tij.
“Edi Rama gjithashtu u ankua se nuk kishte se kujt t’ia çonte dosjet e krimit dhe të korrupsionit.
E mbani mend shumë mirë sesi kryeministri i Shqipërisë Edi Rama vetë, ky mashtrues zgjodhi duke thyer Kushtetutën, duke dhunuar Kushtetutën Arta Markun me 69 vota në mes të flakës dhe të mjegullës në Parlament?
Ju dini që ne kemi goditur ashpër zgjedhjen e Donika Prelës në krye të Prokurorisë së Krimeve të Rënda, që ishte një adresë ku mund të çoheshin dosjet e krimit.
Pra duhet ta dini më së miri që ka pasur adresa se ku mund të shkonin dosjet e krimit, ku ka qenë edhe Prokuroria e Përgjithshme e përfaqësuar nga Arta Marku, e përzgjedhura e qeverisë dhe Donika Prela gjithashtu, Kryeprokurore e Krimeve të Rënda”, tha Vasili.
Ai pyeti Ramën lidhur me bashkëpunimin që ka pasur me “çunat e Shijakut, apo çunat problematikë në Dibër, për të grabitur votat e pushtetit dhe për ti shpërblyer ata që merrnin rreth e përqark me poste ministrore, drejtoria dhe gjithfarësh? Po kush i rrëmbeu me dhjetëra tendera, duke filluar nga Durrësi si një simbol i famshëm i rrëmbimit të krimit dhe i ndarjes së tenderave pafund, e miliona e miliarda të tjera nga kriminelët, dhënë dhuratë për shërbimet e tyre? A i bëri qeveria?”
Në vijim të akuzave, Vasili tha se sot Rama po rrëmben edhe Reformën në Drejtësi.
“Ky që flet sot për KÇK, ky sot rrëmben Reformën në Drejtësi, e shqyen e bën copa-copa dhe SPAK-un që duhet të hetojë kryeministrin, ministra me radhë, që nga ministri i Brendshëm që publikisht merret vesh se çfarë ka bërë për të helmuar shqiptarët që protestojnë kundër tij, SPAK-un e merr dhe e fut në sqetullën e tij.
Ku përfundoi Reforma në Drejtësi me institucione të pavarura siç ishte SPAK-u dhe BKH që pritet të ndërtohet. Ju e dini shumë mirë që ligji për SPAK-un u votua nga të gjitha aktorët politik edhe nga partia Demokratike, e cila në atë kohë refuzoi të votonte në atë kohë 6 ligjet e paketës për Reformën, pra kishte një mirëkuptim të plotë politik që të ngrihej një instrument mbi politikën, jashtë politikës që të luftonte krimin. Çfarë bëri mashtruesi Edi Rama? Sot po përpiqet ti ligjërojë dhe ti mbush mendjen shqiptarëve që ky SPAK-u nën sqetullën e qeverisë mund të luftoj krimin e po vetë qeverisë. SPAK-u nën urdhërat e ministrit të Brendshëm të Shqipërisë, që është asgjë më shumë se zgjatimi, apendixi i Edi Ramës.
Këto mashtrime të trasha që i japin kohë krimit, të cilët i dhanë frymëmarrje për 6 vite e gjysëm krimit, megjithëse kryeministri do të precizojë se është 6 vite e gjysëm në pushtet, 6 vite gjysëm i dha frymëmarrje pafund krimit dhe ky krim nuk u ndëshkua, drejtësia e re që do lindte me Arta Markun dhe të tjerë e bëri krimin dhe kriminalizmit të ngjitej në nivelet më të larta edhe jashtë Shqipërisë, deri në Amerikë, Amerikën Latine, Lindjen e Mesme dhe deri në Europë”, tha Vasili.
