Kryeministri i Kosovës, Albin Kurti, zhvilloi një vizitë disa orëshe në Tiranë, ku u takua me Kryeministrin Edi Rama, Presidentin Ilir Meta, Kryetarin e Kuvendit, Gramoz Ruçi, si dhe me kreun e PD-së, Lulzim Basha.
Në agjendën e takimeve të Kurtit ishte edhe ai me Kryebashkiakun Erion Veliaj, i cili madje do i jepte “çelësin e Tiranës”.
Por takimi nuk u mbajt, ndërsa u raportua se agjenda ndryshoi për faktin se Kryeministri i Kosovës kishte një takim në Prishtinë me ministrin e Jashtëm italian.
Pak muaj më parë raportet mes Kurtit dhe Veliajt u acaruan, pasi Kryebashkiaku i Tiranës në distancë i kujtoi Kryeministrit të Kosovës se u votua për të qeverisur atje dhe jo për të ndërhyrë në punët e Tiranës. Mesazhi i Veliajt kishte të bënte me qëndrimin e VV-së në Shqipëri kundër dhunës policore dhe asaj bashkiake ndaj banorëve të Unazës së Re, banesat e të cilëve u shembën.
Ndërkohë sot në Tiranë, Kurti nuk nguroi t’ia bënte të qartë Ramës se para mini-Shengenit Ballkanit ka si prioritet makro-Shengenin shqiptar, deklaratë kjo që nuk u mirëprit nga Kryeministri, i cili fillimisht e kaloi me një batutë dhe ripërsëriti qëndrimin e tij ndaj mini-Shengenit si një proces që do rrëzojë barrierat.
E ndërsa pas takimit dhe konferencës me Ramën, Kurti vijoi normalisht agjendën, me shpejtësi në media qarkulloi lajmi se Veliaj nuk kishte kohë të priste në takim Kryeministrin e Kosovës.
“Albin Kurti ka devijuar axhendën, nuk kam kohë ta pres pasi kam anagzhime të tjera. Nuk mund ta pres sepse kemi axhendën tonë për 100 vjetorin e Tiranës”, raportohet të ketë deklaruar Veliaj.
Por sikundër mësohet, Veliaj pak para takimit me Kurtin ka pritur në zyrë Shpend Ahmetin, kryebashkiakun e Prishtinës, i cili është larguar nga VV pas debateve të ashpra me Kryeministrin e Kosovës.
Dhe duket se kjo është arsyeja që Kurti ka nxjerrë jashtë agjende Veliajn, pavarësisht se në disa prej mediave në Tiranë u raportua se Kryebashkiaku i Tiranës nuk kishte kohë.
Por me shumë gjasa, duke njohur profilin e politikanit Veliaj, ai kurrë s’do të humbiste rastin të shfaqej në krah të Kurtit, ti jepte çelësin e qytetit dhe mundësisht të mbante “leksione”.
