Tekniku spanjoll, Unai Emery, ishte në krye të PSG-së në atë humbje 6-1 kundër skuadrës së Barcelonës. Djemtë e tij kishin fituar 4-0 ndeshjen e parë të eliminimit direkt në Champions League, por në “Camp Nou” ndodhi çudia e madhe në mars të vitit 2017.
Katalanasit shënuan tre gola pas minutës së 88-të dhe arritën një kualifikim të çmendur. Në një prononcim për France Football, Unai Emery zbulon dy fajtorët e asaj disfate të turpshme: Thiago Silvën dhe arbitrin kryesor të ndeshjes.
“Thiago Silvës i kisha kërkuar të dilte nga zona e tij, të guxonte më shumë dhe të mbronte më lart, në mënyrë që presioni nga kundërshtarëve të ishte më efikas. Punova shumë me të në këtë aspekt, por nuk arritëm rezultatet e pritura”.
“Kjo karakteristikë reflektohej në gjithë skuadrën që, nën presion, kishte tendencë për t’u tërhequr pas. Pikërisht kjo gjë na ndodhi me Barcelonën. Ky është shkaku pse preferova Kimpembe në ndeshjen me Realin. U eliminuam edhe nga vendimet e arbitrit, nuk kishte VAR atëherë“, thekson Unai Emery.
