Nga Boldnews.al
Brenda Rilindjes ka shpërthyer kudo. Nuk po grinden për mënyrën qeverisëse, as për parimet morale dhe ligjore, por për ndarjen e “plaçkës”. Ditën e sotme u pezullua nga detyra Genti Picari, nënkryetari i Bashkisë së Vorës, pas padisë së bërë nga një grup Rilindasish të tjerë në këtë bashki.
Të gjithë kanë “ideale” të njëjta politike, por sot zyrtarët e Rilindjes nuk po njohin asnjë kufi, ku ndarja e të mirave materiale, që shpesh është korrupsioni që del nga pika e fundit e djersës së qytetarëve, po i fut në sherr zyrtarët. Kudo në administratë po hanë njëri-tjetrin dhe janë shtuar denoncimet për shkeje administrative, por edhe penale. Picari ra sot me vendim gjykate, pasi ishte emëruar në këtë detyrë ditën kur për ish-kryabshkiakun Agim Kajmaku u mor vendimi i shkarkimit nga KQZ.
Sot, kryebashkiakët e Ramës nuk po i pakëson vetëm Ligji i Dekriminalizimit, por më së shumti lukunia e vetë pushtetit, që në mungesë të kundërshtarëve, po grin veten. I ngjan asaj periudhe të para viteve 90’ që “luftën e klasave” e shtrinë edhe brenda partisë. Në atë kohë të fluturonte koka nëse bëhej një grup njerëzish, me dhe pa teserën e komunistit dhe shkruanin letra anonime për një kundërshtar që ishte pjesë e sistemit.
Dënime me burg apo edhe internimet ishin të zakonshme. Dhe sot është e njëjta situatë, askush nuk pyet për ligjin, pasi drejtësinë e re e kanë futur nën obrellën Rilindje, denoncimet e qytetarëve nuk merren në konsideratë, ndaj ka mbetur vetëm lufta mes të ngjashmëve.
Më e theksuar kjo përplasje mes këtyre zyrtarëve që paguhen për ti shërbyer publikut është në bashkitë e vendit, kadastrës, doganave dhe tatimeve. Aty janë benefitet më të mëdha ku futen duart në tenderat publik, preket prona e qytetarëve, apo bëhen marifete shifrash në miliona euro si pjesë e detyrimeve tatimore.
Kjo majme e padrejtë ka krijuar grupime zyrtarësh kundrejt të tjerëve, pasi në mes është “plaçka e siguruar” nga pushteti i pakufijtë i Rilindjes. Gjithashtu pritet një tjetër valë skandalesh në bashkitë e tjera të vendit, pasi janë vetë psrfaqësuesit e Partisë Socialiste që po bëjnë denoncime kundër kryebashkiakëve të cilët janë me të kaluar kriminale.
Kjo situatë kulmoi edhe me zgjedhjet e drejtuesve lokal në Partinë Socialiste, ku në zona të ndryshme plasi grushti, sulmet me mjete të forta dhe kandidatë të Rilindjes që përfunduan me hematoma në trup. Rrahësit dhe të rrahurit ishin po Rilindas, ndaj denoncime direkte nuk kishte, duke vijuar të thurin plane si ti hajnë kokën njëri-tjetrit.
Shprehja e famshme “hëngshin kokat e tyre” doli nga goja e kryeministrit kur u pyet për përplasjet e grupeve rivale të krimit të organizuar, kryesisht të trafikut të drogës. Sot e njëjta situatë po shfaqet kudo në administratën e vendit, ku zyrtarët ashtu si “bandat e krimit” po sulen ndaj shoshoqit për të përfituar sa më shumë nga allishverishet dhe benefitet e tjera materiale që u vjen nga i ëmbli pushtet!
