Tërmeti i 26 nëntorit ka dëmtuar 273 objekte shkollore dhe universitare, 56 prej të cilave kanë pësuar dëmtime të rënda. Shifrat janë bërë publike nga ministrja e Arsimit, Besa Shahini, sipas të cilës për rindërtimin e godinave duhen 83 mln euro.
E pranishme në Komisionin e Medias, Shahini tha se është përgatitur një plan rigoroz për rimëkëmbjen, ku ndërhyrjet do bëhen në tre faza dhe se procesi do zgjasë për një periudhë kohore prej 5 vitesh.
“Në total janë dëmtuar 273 objekte shkollore dhe universitare, së bashku me konviktet shkojnë 307. 56 prej tyre kanë dëmtime të rënda.
Vlera e dëmeve të shkaktuara është llogaritur të jetë 64 milionë euro ndërsa vlera e humbjeve të tjera, si trajnime të ndryshme që është dashur të bëhen me psikologë, mësues dhe transporti për ti dërguar fëmijët në shkollat pritëse është 9 milionë euro.
Është hartuar një plan shumë rigoroz i rimëkëmbjes me ndërhyrje afat shkurtra, janë ndërhyrjet afatmesme që përfshijnë intervenimet në infrastrukturën shkollore, aty ku duhet të ndërtohet nga e para apo rindërtohet pjesërisht ndonjë shkollë e dëmtuar.
Dhe plani afatgjatë është i përqendruar më shumë në menaxhimin e situatave të rrezikshme për të ardhmen, pra për forcimin e shkollave në mënyrë që në rast të tërmeteve që mund të ndodhin në të ardhëm, edhe nëse janë të një magnitudë më të madhe, mos shkaktojnë dëme.
Është vlerësuar se vlera totale e rikonstruksionit vlerësohet në masën e 83 milionë euro. Ndërsa për rimëkëmbjen, trajnimet e mësuesve dhe transportin e nxënësve dhe gjithë procesin tjetër mbështetës do të kushtojë 12 milionë euro dhe kjo shtrihet në një periudhë kohore 5-vjeçare”, tha ministrja Shahini.
Një pjesë e shkollave të dëmtuara nga tërmeti i 26 nëntorit janë rikonstruktuar në vitet e fundit, përfshi edhe ato në territorin e Bashkisë së Tiranës.
