Përplasje mes Abidal dhe Messit, Barcelona mban mbledhje me francezin

Skuadra e Barcelonës është shumë larg pritshmërive këtë sezon, ku më shumë se rezultatet është loja e blaugranasve ajo që ngre shqetësime të shumta.

Së fundmi deklarata e drejtorit të Barcelonës, Erik Abidal se futbollistët nuk ishin të motivuar kur ekipin e drejtonte Valverde: “Shumë lojtarë nuk ishin të kënaqur, nuk punojnë shumë dhe kishte probleme me komunikimin e brendshëm. Marrëdhënia mes trajnerit dhe futbollistëve gjithmonë ka qenë e mirë, por si ish-futbollist arrij t’i kuptoj disa gjëra. I kam thënë klubit se çfarë mendoja dhe më është dashur të marr një vendim.”

Messi ka vendosur që këtyre fjalëve të ish-shokut të tij të skuadrës t’u përgjigjej me një postim në Instagram: “Sinqerisht, nuk më pëlqen të bëj gjëra të tilla, por mendoj se të gjithë duhet të marrin përgjegjësitë që punën që u takon. Lojtarët përgjigjen për atë që ndodh në fushë dhe ne kemi qenë të parët që e kemi pranuar kur nuk kemi luajtur mirë. Kur flitet për lojtarët, duhet të japësh emra, ndryshe i lëndon të gjithë më gjërat që thua, që nuk janë të vërteta.”

Përplasja Messi-Abidal ka alarmuar kupolën drejtuese të Barcelonës. “El Mundo Deportivo” shkruan se presidenti Josep Maria Bartomeu mund të marrë që sot vendimin për të shkarkuar francezin.

LEXO EDHE  “Lazio do të na ndihmojë në eliminimin e Juventusit nga Championsi”