Paketa anti-shpifje e miratuar njëherë me votat e Rilindjes në Kuvendin e Shqipërisë dhe e kthyer për rishikim në Parlament nga Presidenti Ilir Meta është dërguar në Komisionin e Venecias nga OSBE. Kjo është bërë e ditur nga përfaqësuesi i OSBE-së për lirinë e mediave, Harlem Desir, i cili u shpreh për përmirësime të mëtejshme të paketës.
“I dërgova Komisionit të Venecias shqyrtimet ligjore mbi projektligjin shqiptar për Median Audiovizuale dhe Komunikimin Elektronik, pasi parlamenti shtyu votimin javën e kaluar.
Ky është një rast i rëndësishëm për të bërë përmirësime të mëtejshme para votimit të ri në parlament’, shkruan Desir në rrjetet sociale.
Komisioni i Venecias pritet të marrë në shqyrtim draftin ligjor që njihet si paketa “anti-shpifje” në fundin e javës së tretë të muajit mars.
Mazhoranca parlamentare u tërhoq nga rivotimi i paketës pas presionit ndërkombëtar, edhe pse më parë ishte njoftuar se dekretet e Presidentit që kërkonin rishikimin e ligjeve do të rrëzoheshin. Por në momentet e fundit, Taulant Balla njoftoi tërheqjen nga nisma derisa të shprehej Komisioni i Venecias.
Qëndrimi më i fundit i OSBE-së, Presidenca e të cilës mbahet nga Shqipëria dhe drejtohet nga Kryeministri Edi Rama, i cili zyrtarisht është edhe ministër i Jashtëm, tregojnë se deklaratat e Qeverisë shqiptare se paketa ishte në përputhje me qëndrimet dhe rekomandimet e OSBE-së nuk qëndrojnë.
Ligji i miratuar nga qeveria shkaktoi debate të forta. Ai u kundërshtua nga opozita dhe organiztatat që mbrojnë të drejtat e njeriut, por edhe mediave, dhe u konsiderua si një censurë e qeverisë ndaj lirisë së fjalës.
