Ende, duket se nuk ka dakortësi mes vendeve anëtare të BE-së për një vendim unanim “po” çeljes së negociatave të Shqipërisë me BE-në. Kjo u konfirmua nga Presidenti i Parlamentit Evropian (PE), David Sassoli, gjatë një konference nga Kryeministria krah kreut të qeverisë shqiptare Edi Rama, kur tha se “shumë shtete anëtare” (dhe jo të gjitha) janë pro hapjes së negociatave.
Sassoli është pritur këtë të hënë në hyrje të Kryeministrisë nga Rama. Të dy zhvilluan një takim e më pas folën në një konferencë për mediat. Presidenti i PE nuk konfirmoi arritjen e unanimitetit të vendeve të unionit për integrimin, megjithatë u shpreh optimist.
“Procesi i anëtarësimit duhet të nisë, janë të bindur shumë shtete anëtare, KE, PE kjo është vetëm një vonesë”, tha ai.
“Pozicioni i disa qeverie ishte të rishikohej procesi i anëtarësimit. Ditët e ardhshme do kemi një propozim për ndryshime, si PE kjo na bën të shpresojmë, se mbase kemi kapërcyer disa çështje që kanë të bëjnë me metodologjinë, procesi i anëtarësimit mund të nisë me shpejtësi. Paketa duhet të ecë njëkohësisht me Shqipërinë dhe Maqedoninë e Veriut. Mbasi të jenë rishikuar disa mekanizma, gjithë vërejtjet do të kapërcehen”, deklaroi Sassoli.
Kryeministri Edi Rama, duke folur për qëndrimin e Francës, shteti që vitin e kaluar vuri veton për hapjen e negociatave me Shqipërinë tha se:“Nuk e kanë me ne, se sa e kanë me nevojën për të ndryshuar mekanizmat që sipas tyre duhet të funksionojnë më mirë”.
Gjatë konferencës së përbashkët, u tha se paketa anti-KÇK, përshtatja e ligjeve të Shqipërisë me vendet e BE, ndihmat për tërmetin, bashkëpunimi mazhorancë-opozitë për reformën zgjedhore, ishin disa nga temat për të cilat u fol në takimin dypalësh.
Më vonë gjatë ditës, është parashikuar që Sassoli të zhvillojë takime dhe me Presidentin Ilir Meta, kryetarin e PD-së, Lulzim Basha dhe kryetaren e LSI-së, Monika Kryemadhi.
