Nga BoldNews.al
Interes i madh, 40 kandidatura për një post, të gjithë e duan BKH-në, (Byronë Kombëtare të Hetimit), por vetëm njëri do të fitojë. Nga 40 të interesuar, SPAK bëri një krehje të mirë, duke lënë në proces kandidimi 18 persona. Bie në sy një emër i veçantë, Agim Ismaili, aktualisht Drejtor i Përgjithshëm i Burgjeve. Korrikulumi i kandidatëve është i “rëndësishëm”, mundësisht vendin e kreut të BKH-së duhet ta mbajnë “burra me mustaqe”, që gëzojnë mbështetjen e kryeministrit.
Shpesh janë shkundur burgjet, por vetëm njëri nuk lëviz, ai është drejtori Agim Ismaili. Skandalet e shumta kanë emra të përvetshëm dhe sot gjendemi para një fakti që drejtorinë e BKH-së, siç një ambasadë e rëndësishme e quan edhe si “FBI-ja shqiptare” kërkon që ta ketë në duar Ismaili i burgjeve.
Pikërisht ditën e sotme kur emri i tij u rëndit në listët e të kualifikuarve, një i dënuar dyshohet se vrau veten në Burgun e Peqinit. Të tjera ngjarje të ngjashme janë regjistruar edhe në muajt e kaluar, e sërish kryegardiani është po aty, me fermanin e kryeministrit që ia tund kujtdo që i kundërvihet mënyrës së drejtimit të tij të institucioneve të larta shgtetërore.
Fillimisht habiti jo pak kur në krah të tij kryeministri kishte si “dekor” një burrë të “rëndë”. E prezantoi si kreun e AKU-së (Autoriteti Kombëtar i Ushqimit). Vend pëllumbash konsiderohet për karrieristët dhe qejflijtë e parasë… Pak muaj iu desh në atë post për të dalë me një mal me akuza në lidhje me mënyrën e kontrollit ushqimor dhe gjobave selektive mbi bizneset private.
Ismaili iku, por një tjetër post ia gjetën taman me porosi të kryeministrit dhe me miratin të detyruar të ministresh Gjonajt. Që në momentet e para pati përplasje me Drejtorin e Policisë së Burgjeve Bardh Kaçorri, një ushtarak i vjetër, ish-komandant i FNSH-së dhe efektiv i lartë policie i vlerësuar në shumë raste, por Ismaili tundte fort fermanin e kryeministrit, deri sa i gjeti momentin ti hante kokën.
Ka një histrizëm kolektiv në turrjen ndaj gjyqtarëve që lirojnë nga burgjet të dënuarit përjetë, por pak duan ta kaptojnë se derën e qelisë këtyre bosevë të krimit ua ka çelur Drejtoria e Përgjithshme e Burgjeve. Në gjykata kanë dorëzuar dokumentat që i cilësojnë të dënuarit për disa vrasje si me “sjellje shembullore”, apo edhe si “punëtorë ekselentë” që meritojnë ulje dënimi. Të gjitha këto referenca në fund mbajnë edhe firmën e drejtorëve të burgjeve përkatëse, në varësi të Ismailit të kryeministrit.
Bota e errët e burgjeve është edhe më e frikshme sesa qelitë që mbajnë të izoluar të dënuarit, ku lëviz para e madhe, drejtim organizatash kriminale që nga burgu dhe benefite të shumta për të dënuarit që konsiderohen si pjesë e grupeve të strukturuara kriminale. U shkund e gjithë Drejtoria e Përgjithshme e Burgjeve pasi një i dënuar “VIP” shëtiste nga ish-Blloku me eskortë policie, ku si shkak u gjet vizitë në një klinikë private. Por ndërsa të burgosurit e tjerë nuk dërgohen as në Spitalin e Burgjeve dhe vdesin nëpër qeli të harruar, për të dënuarin “VIP” kërkohej një klinikë private dhe një shëtitje në zonën e qejfit në Tiranë…! Firma poshtë e Gimit të Ramës!
Dhe sot mund të jetë dita që Ismaili të pretendojë fort për kreun e BKH-së. Si CV të pasur nuk ka vetëm “mustaqet” e dendura, por mbështjen e kreut të qeverisë. Nuk është apska çudi që emri i tij të diskutohet pafundësisht për të qenë drejtues i BKH-së, këtij institucioni që do të luftojë krimin e organizuar dhe korrupsionin në nivele të larta politike.
