Kryeministri Edi Rama ka reaguar lidhur me marrëveshjen e arritur mes Lëvizjes Vetëvendosje dhe LDK-së për formimin e qeverisë së re në Kosovë.
Ndërsa i ka uruar suksese dy partive fituese në zgjedhjet e fundit parlamentare, Rama uron që të ketë një bashkëpunim sa më të dobishëm.
“Suksese VV-LDK në formimin e qeverisë së re dhe në qeverisjen e Kosovës! Uroj të kemi një bashkëpunim sa më të dobishëm për shqiptarët këtej e andej kufirit dhe pres me padurim të shtrojmë në tryezë çështjen e lëvizjes së lirë të qytetarëve e të sipërmarrjeve në kufirin tonë”, shkruan Rama.
Pas 4 muajsh nga zgjedhjet e parakohshme të 6 tetorit në Kosovë, më në fund është arritur marrëveshja për krijimin e qeverisë së re mes Lëvizjes Vetëvendosje dhe LDK-së. VV dhe LDK do të kenë nga 6 ministra secila, ndërsa 3 Ministri do të drejtohen nga komunitetet. Në bazë të marrëveshjes, Kryetari i Kuvendit të Kosovës do të jetë nga rradhët e LDK-së, ndërsa për postin e Presidentit palët do të nisin bisedimet në një tjetër moment.
