Spektakël dhe gola, Leicester-Chelsea përfundon në barazim

Leicester City dhe Chelsea zhvilluan një ndeshje spektakolare, por në fund nuk pati fitues dhe të dy ekipet morën nga një pikë, pasi ndeshja përfundoi në barazim 2-2.

Pjesa e parë nuk dhuroi gola, pavarësisht se skuadrat krijuan raste. Miqtë pretenduan për një penallti në minutën e 21-të.

Abraham u rrëzua në zonë, por arbitri vendosi të mos akordonte penallti pas shikimit të pamjeve në VAR. 45 minutat e dyta ishin plot emocione dhe djemtë e Lampard kaluan menjëherë në avantazh. Mount krosoi një top nga goditja e këndit dhe Antonio Rudiger goditi saktë me kokë.

“Dhelprat” reaguan dhe gjetën barazimin në minutën e 54-t. Harvey Barnes lëvizi bukur në krahun e majtë, goditi drejt portës dhe u ndihmua edhe nga një devijim. Topi në rrjetë dhe asnjë shans për portierin Caballero.

LEXO EDHE  Bonaventura thuajse i larguar nga Milani, Roma shfaq interes për lojtarin

Leicester e rriti presionin dhe shënoi një tjetër gol dhjetë minuta më vonë. Mbrojtësi Chilëell përfitoi nga një kros i Tielemans dhe kaloi vendasit në avantazh. Festë në stadium, por për të vendosur heshtjen mendoi sërish Rudiger.

Mbrojtësi gjerman shfrytëzoi një tjetër kros të Mount në minutën e 71-të dhe mposhti Schmeichel me një goditje shumë të bukur me kokë. Përfundimisht 2-2 dhe Leicester vijon të ruajë vendin e tretë me 49 pikë, ndjekur nga “Blutë e Londrës” me tetë pikë më pak.