Britanikët kanë festuar dhe protestuar përgjatë orëve të natës daljen zyrtare të vendit të tyre nga Bashkimi Europian, duke lënë pas një histori plot 47 vjeçare, kur Britani e Madshe ishte pjesë e BE.
Mbretëria e Bashkuar u divorcua zyrtarisht nga BE sapo akrepat shënuan orën 00:00 të datës 1 shkurt 2020, ndërkohë që bisedimet për Brexit nisën 3 vjet më parë.
Disa mijëra anglezë morën pjesë në festime, të tjerë protestonin, ndërsa Kryeministri Boris Johnson iu drejtua më parë kombit me një fjalim inkurajues.
Ai përshëndeti momentin e quajtur të shpresës, duke iu drejtuar atyre që menduan se ky çast nuk do të vinte kurrë.
Britania tani ka hyrë në një periudhë 11-mujore tranzicioni me BE-në, gjatë së cilës qeveria do të garojë për të arritur një marrëveshje tregtare para dhjetorit.
Mbështetësit e Brexitit e kanë konsideruar këtë ngjarje si fitore, si “ditë të pavarësisë” dhe nisje të një epoke të re për shtetin e tyre.
Disa prej tyre janë dëgjuar duke kënduar “Zot ruaje Mbretëreshën”, ndersa të tjerë janë përqafuar nën dritën e fishekzjarreve.
“Lufta ka përfunduar, ne fituam”, ka thënë Nigel Farage, udhëheqës i fushatës për largim të Britanisë nga BE-ja.
“Ky është një nga momentet më të rëndësishme në historinë moderne të shtetit tonë”, ka thënë mes tjerash ai.
Një mbështetëse e Brexitit ka festuar në orët e para të së shtunës para sheshit të Parlamentit.
“Absolutisht, është gëzim dhe optimizëm”, ka thënë Emma Sandercock, shtetase britanike.
Liderët më të fuqishëm të BE-së, kancelarja gjermane, Angela Merkel dhe presidenti francez, Emmanuel Macron, e kanë konsideruar largimin e Britanisë si moment të trishtë dhe pikë kthese për Evropën.
