Ka ndërruar jetë në mënyrë misterioze biznesmeni i kromit në Bulqizë, Murat Duriçi. Sipas informacioneve paraprake, 53-vjeçari është gjetur nga kalimtarë të rastit në kanal, mes qytetit të ri dhe të vjetrit në Bulqizë. Në momentin kur biznesmeni u gjet nga kalimtarët, menjëherë është transportuar me ambulancë drejt spitalit për të marrë ndihmë mjekësore.
Më pas, në gjendje të rëndë shëndetësore, nga spitali i Bulqizës, Duriçi është nisur drejt Spitalit të Traumës në Tiranë ku rrugës ka ndërruar jetë. Duriçi rrallë herë lëvizte në këmbë.
Paraprakisht mësohet se Duriçi është përplasur nga një furgon duke përfunduar në kanal, por hetimet vijojnë nga policia për të zbardhur rrethanat. Policia ka marrë fillimisht dëshmitë e personave që e gjetën dhe e dërguan në spital. Në pjesën e rrugës ku është gjetur në kanal Duriçi nuk ka kamera sigurie.
Në njoftimin zyrtar policia bën me dije se biznesmeni është aksidentuar nga M.C., i cili drejtonte automjetin tip “Ford”. “Drejtuesi i automjetit pas aksidentit ka braktisur automjetin duke u larguar nga vendi i ngjarjes, ku pas kërkimeve nga ana e policisë është bërë e mundur kapja dhe shoqërimi i tij në komisariat.”-raporton Policia
Nuk përjashtohen dyshimet e një eleminimi mafioz, për shkak të veprimtarisë që Duriçi kishte në fushën e kromit. Murat Duriçi ishte një biznesmen i njohur në zonën e Bulqizës. Ai është marrë me biznesin e kromit dhe sipas të dhënave në QKR, zotëron kompaninë me emrin “KELI-M-13”, në Bulqizë.
Njoftimi i policisë
Bulqizë / informacion paraprak
Rreth orës 21.00, në qytetin e ri të Bulqizës, shtetasi M.C, 45 vjeç, banues në Bulqizë, duke drejtuar automjetin tip ‘ford’, ka përplasur këmbësorin M. D., ku si pasojë ka humbur jetën.
Drejtuesi i automjetit pas aksidentit ka braktisur automjetin duke u larguar nga vendi i ngjarjes, ku pas kërkimeve nga ana e policisë është bërë e mundur kapja dhe shoqërimi i tij në komisariat. Grupi hetimor vijon hetimet për zbardhjen e shkaqeve të aksidentit.
LEXO EDHE:
Detaje të reja/ Kush është biznesmeni kromit që u gjet në kanal
“U gjet në kanal”/ Ndërron jetë biznesmeni i kromit Murat Duriçi
