Gentian Muça është rikthyer në fushë dhe Tirana me të po fiton. Pas derbit, tre pikët edhe ndaj Flamurtarit. Qendërmbrojtësi, i cili mbajti edhe shiritin e kapitenit kundër “demave” të kuq, është i ftuar në emisionin “Pressing” në ABC News.
“Derbi dha frytet e veta, ktheu qetësinë në skuadër. Humbja me Kukësin solli trazira, iku trajneri i dytë. Duhet të reflektonim. Çdo vit na shkonte për keq derbi. Shpresoj të na marrë për mirë këtë herë”, u shpreh qendërmbrojtësi në emision.
“Gjithë ai investim, po nuk pati sukses do ketë pasoja. Nuk mund të ketë largim trajneri sërish, ngarkesa shkon te lojtarët. Tek ata që janë prej vitesh pritet më shumë. Derbi vendoste gjithçka. Ndoshta edhe janë vendosur kush largohet dhe kush rri. Derbi besoj se u jep lojtarëve edhe mundësi tjetër. Uroj të mbyllet gjithçka me mirëkuptim. Nëse do e ndjeja veten i tepërt, do largohesha”.
“Deri para tre javësh nuk kam luajtur. Ndërtimi i pozicioneve ka ndikuar, apo i lojtarëve. Nuk ka pasur lojtarë mjaftueshëm në disa pozicione. Torassa nuk luan në krah, ndihet më mirë në qendër. Organika e pasur i ka këto probleme, si te Partizani. Në fillim e nisëm e mirë, por pastaj pati luhatje që ishin fatale për ne”.
“Problemet në mbrojtje nuk kanë ardhur thjesht prej repartit të mbrojtjes, por për faktin se kemi vuajtur si skuadër në aspektin mbrojtës. Kemi pasur rezultate jo të mira me Laçin. Ta nisim nga fitorja e vjetshme 1-3 dhe nga momenti i mirë që po kalojmë. Shkojmë për të fituar atje”, – tha Muça gjatë emisionit në ABC.
