Ditën e sotme do të luhet e gjithë java e 16-të e Superligës shqiptare, ku 10 ekipe zbresin në fushën e lojës.
Një javë që përplas disa skuadra të forta, pasi dhe diferenca mes ekipeve është shumë e vogël ku mjafton të përmendim diferencën prej vetëm 5 pikësh të vendit të dytë me vendin e tetë që të çon një kategori më poshtë.
Katër takime luhen në orën 13:00. Kukësi i vendit të parë luan në Shkodër ndaj Vllaznisë të vendit të pestë ku diferenca mes skuadrave është katër pikë.
Një përballje mjaft e fortë është ajo mes Bylisit dhe Laçit. Skuadra e Laçit vjen pas një fitoreje të thellë 4-0 ndaj Luftëtarit të Gjirokastrës dhe është në vendin e dytë me 25 pikë ndërsa Bylisi vjen pas barazimit 2-2, ndaj vendit të fundit që mbahet nga Flamurtari dhe aktualisht klasifikohet si e katërta me 24 pikë.
Ndërkohë pas derbit me Tiranën, Partizani ka një tjetër provë të vështirë. Kryeqytetasit luajnë në transfertë kundër Teutës.
“Të kuqtë” vijnë pas dy humbjeve radhazi dhe kërkojnë të kthehen në rrugën e duhur pasi një tjetër hap fals mund të bëjë që skuadra të rrëshqasë akoma më poshtë në renditje. Ndërsa synimi i Teutës është t’i largohet zonës së rënies nga kategoria. Ndeshja tjetër e orës 13:00 është ajo mes Luftëtarit dhe Skënderbeut.
Ndërsa në orën 16:00 kjo javë mbyllet me Tiranën ndaj Flamurtarit. Pas rezultatit pozitiv në derbi, Tirana do të kërkojë dhe pikët e plota ndaj një Flamurtari të pashpresë në vendin e fundit.
