Deputeti Lefter Maliqi i është bashkuar protestës së gazetarëve dhe shoqërisë civile, kundër paketës “anti-shpifje” të qeverisë.
Maliqi tha se sot është një ditë e zezë. “Qeveria dhe kryeministri Rama sot më shumë se kurrë po luan me zjarrin dhe ka për tu djegur vetë. Dhe diktatorët më të mëdhenj në botë, kushdo që ka luajtur me lirinë e fjalës, ka pësuar fund tepër të hidhur”, u shpreh Maliqi nga protesta.
Deputeti deklaroi votën e tij kundër projektligjit, i cilësuar si një paketë që synon të kapë median dhe të cënojë lirinë e shprehjes.
Maliqi shtoi se mbi 80 përqind e opozitës në parlament është kundër projektligjit. “Fatkeqësisht mbi 10 deputetë të opozitës së re vazhdojnë ti shërbejnë kësaj rilindje të kalbur”, u shpreh.
Ai tha se me këtë projektligj, Rama po bën show për të shmangur vëmendjen nga përgjegjësia që shteti ka në tragjedinë me 51 viktima që solli tërmeti i 26 Nëntorit.
Ligjvënësi po ashtu bëri thirrje që populli të ngrihet në protesta për të rrëzuar Ramën nga drejtimi i qeverisë.
“Jam gati të iki nga ky parlament, por deputetët e tjerë nuk më binden”, u shpreh.
Deputeti akuzoi Ramën dhe qeverinë për korrupsion.
“Sa pasuri kanë këta në qeveri të fshehura? Këta ndërtojnë jo Durrësin, po një Tiranë të tërë! Kanë vjedhur janë babëzitur, mos u fryfshin! Dy metro vend ka, Ramës po i japim 2 e 20 meqë është i gjatë”, e mbylli prononcimin deputeti.
