Dybala ka zhbllokuar takimin në minutën e 9-të, ndërsa vendasit janë përgjigjur në të 35-ën me Caprari-n, që në minutën e 92-të ka lënë ekipin me 10 lojtarë pasi ka marrë kartonin e dytë të verdhë.
Momenti që ka vendosur ndeshjen ka ardhur në fundin e pjesës së parë, me Cristiano Ronaldo që ka fluturuar në zonën e rreptësisë kundërshtare dhe ka fiksuar shifrat në 2-1.
Juventus kryeson renditjen me 42 pikë, tri më shumë se Inter-i, që ka një ndeshje më pak. Vështirësohet gjendja e Sampdoria-s, që ndodhet në vendin e 17-të me 15 pikë.
Kjo ka qenë fitorja e 100-të për Maurizio Sarri-n si trajner në Serinë A. Trajneri italian e ka arritur këtë shifër në 169 ndeshje. Mes trajnerëve që kanë debutuar në kategorinë kryesore të futbollit italian nga sezoni 1994-95 e në vazhdim, askush nuk e ka arritur këtë shifër para tij.
