Nga Boldnews.al
Prokuroria e Durrësit pritet të kërkojë arrest me burg për të gjithë personat e ndaluar pak ditë më parë, në vijim të hetimit për dëmet e shkaktuara nga tërmeti tragjik i 26 Nëntorit.
Gjithësesi, veprimet konkrete, megjithëse ende jo të plota të prokurorëve, pritet të kalojnë “testin” e një emri të vetëm-Ahmet Doda, drejtor i Kavalishencës së Durrësit, i ndaluar si person i dyshuar për “shpërdorim detyre”, pas vdekjes tragjike të zyrtarit të lartë policor, Bajram Hajdarmetaj.
Sipas raportimeve mediatike dhe një statusi të sekretarit të Përgjithshëm të Lëvizjes Socialiste për Integrim, Endri Braimllari, Ahmet Doda është djali i dajës së Taulant Ballës, numri dy i Partisë Socialiste.
Ahmet Doda u ndalua Policia, me urdhër të Prokurorisë, nën dyshimet se ai nuk ka marrë masat për rikuperimin e dëmeve të konsiderueshme, të shkaktuara në godinën e Shtëpisë së Pushimit të Ministrisë së Brendshme, pas tërmëtit të 21 Shtatorit.
Një dokument i Institutit të Ndërtimit konstatoi problematika të theksuara në ndërtesë, si edhe caktoi detyra për drejtuesit administrativë të Kavalishencës, para se ajo të rikthehej në kushte funksionale.
Por, mesa duket, rekomandimet e ekspertëve nuk janë marrë në konsideratë nga zyrtarët e Shtëpisë së Pushimit, rrëzimi i pjesshëm i së cilës në 26 Nëntor 2019 vrau në gjumë oficerin Hajdarmetaj, lektor në Akademinë e Sigurisë.
Në vijim të veprimeve proceduriale, Prokuroria e Durrësit urdhëroi ndalimin e drejtorit të Kavalishencës, Ahmet Doda, si i dyshuar për “shpërdorim detyre”, dhe të përgjegjësit të shërbimeve, Kujtim Hasa, i dyshuar për “vrasje”.
Tashmë, beteja ligjore me Dodën dhe 8 të ndaluarit e tjerë do të vijojë në gjykatë. Paraprakisht, “Boldnews.al” mëson se prokuroria do të kërkojnë qëndrimin në qeli të të gjithë të dyshuarve.
Gjithësesi, mbetet për t’u parë qëndrimi i saj përfundimtar në gjykatë dhe, më tej, vendimi i togave të zeza, sidomos për të mbajtur apo jo në qeli Ahmet Dodën, njeriut të afërt të Taulant Ballës.
Nga emrat për të cilët është lëshuar urdhër-ndalimi deri më tani, ai i Dodës është me funksionin më të lartë, pavarësisht se pritshmëritë dhe dyshimet për kryerje veprash penale shkojnë përtej disa zyrtarëve të vegjël lokalë.
