Paketa anti-shpifje, e cila po diskutohet prej ditësh në Shqipëri ka marrë një vëmendje të madhe.
Asociacioni i Gazetarëve të Kosovës i është bashkuar thirrjes së gazetarëve dhe mediave shqiptare, organizatave të medias, të shoqërisë civile si dhe organizatave ndërkombëtare, të cilat kërkojnë nga qeveria shqiptare të tërheqë paketën ligjore “anti-shpifje” që i është propozuar Kuvendit.
“Me miratimin e ndryshimeve në Ligjin për mediat audiovizuale dhe Ligjin për komunikimet elektronike, Autoriteti i Medieve Shqiptare (AMA) dhe Autoriteti i Komunikimeve Postare dhe Elektronike (AKEP) do të lejohen të bllokojnë menjëherë faqet e internetit të mediave, të vendosin gjoba të papërballueshme për gazetarët dhe penalizime të rënda deri në mbylljen e portaleve.Edhe përfaqësuesi i OSBE-së për Lirinë e Mediave, Harlem Desir paralajmëroi se “gjobat e tilla mund të çojnë në mbylljen e mediave dhe të shihen si presion indirekt.”
Federatat Evropiane dhe Ndërkombëtare të Gazetarëve (EFJ / IFJ) i janë bashkuar thirrjes për tërheqjen e dy projektiligjeve që kërcënojnë lirinë e shprehjes dhe atë të medias. Sipas tyre propozimet nuk janë në përputhje me praktikat më të mira të vetë-rregullimit dhe do të kishin një ndikim negativ në lirinë e shprehjes në Shqipëri.
”AGK vlerëson se këto dy drafte e çensurojnë drejtpërdrejt median online dhe rrezikojnë seriozisht lirinë e shprehjes. “E drejta e fjalës, në çdo vend demokratik trajtohet nga kodet e etikës dhe organet vetërregulluese të medias”, thuhet në deklaratë.
