Artur Metani, vëllai i ish-ministres së Rilindjes, Eglantina Gjermeni, dhe këshilltar i Presidentëve në periudhën 2002-2012, renditet i pari nga Këshilli i Emërimeve në Drejtësi, në pikëzimin që i është bërë kandidatëve për vendin vakant të Inspektorit të Lartë të Drejtësisë.
Metani është paralajmëruar si kandidati kryesor për pozicionin e ILD-së kohë më parë.
Pavarësisht se posti që ka mbajtur si këshilltar pranë dy Presidentëve, e skualifikon automatikisht nga gara, për faktin se pozicioni i këshilltarit konsiderohet si post politik, dhe në ligj parashikohet që kandidatët për ILD nuk duhen të kenë pasur funksione politike në 10 vitet e fundit, Metani, jo vetëm është pranuar si kandidat por renditet edhe i pari.
Metani, përveç pozicioneve që ka pasur pranë zyrtarëve më të lartë të PS-së, përfshi edhe si i emëruar nga Rama në pozicionin e Avokatit të Shtetit, kur zëvendësoi Alma Hickën, rezulton se është një nga zyrtarët e Fondacionit Soros, i njohur ndryshe si “Fondacioni i Shoqërisë së Hapur për Shqipërinë”.
Në garën për ILD kanë marrë pjesë 5 kandidatë që janë intervistuar dhe KED ka kryer renditjen e pikëve, nga ku rezulton se Metani ka 89.6 pikë, ndërsa prokurori Sokol Stojani 89 pikë.
Ndërkohë që kandidatja Lindita Troja është vlerësuar me 63.4 pikë, duke u renditur e fundit në listën me 5 kandidatë.
Dy kandidatët e tjerë në garë Eris Hysi dhe Joana Asimi Sorraj janë vlerësuar përkatësisht me 78.3 pikë dhe 82.5 pikë.
Rezultati paraprak i pikëzimit për secilin kandidat të vlerësuar është si më poshtë:
Artur Metani 89.6 Pikë
Sokol Stojani 89 Pikë
Joana Asimi Sorraj 82.5 Pikë
Eris Hysi 78.3 Pikë
Lindita Troja 63.4 Pikë
“Krahas procesit të punës për zbardhjen e vendimeve të arsyetuara për vlerësimin dhe pikëzimin e secilit kandidat të lejuar, në zbatim të nenit 239 të ligjit nr.115/2016 dhe të pikave 67-74 të Vendimit nr.5 datë 02.04.2019 “ Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, në mbledhjen e ardhshme të Këshillit, do të shqyrtohen dhe miratohen:
a) Lista përfundimtare e renditjes së kandidatëve për vendin vakant të Inspektorit të Lartë të Drejtësisë;
b) Raporti i arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes së tyre, për vendin vakant të Inspektorit të Lartë të Drejtësisë.
Pas shqyrtimit dhe miratimit të këtyre akteve në mbledhjen e ardhshme të Këshillit të Emërimeve në Drejtësi, organit të emërtesës, Kuvendit të Republikës së Shqipërisë, do ti dërgohen Lista Përfundimtare e Renditjes së Kandidatëve dhe Raporti i Arsyetuar i Këshillit ku përmbahet analiza lidhur me plotësimin ose jo të kushteve ligjore të kandidimit nga secilit kandidat në vendin vakant të Inspektorit të Lartë të Drejtësisë, për procedurën e ndjekur në vlerësimin, pikëzimin dhe renditjen e kandidatëve të lejuar, si edhe aktet përkatëse të verifikimit dhe të vlerësimit e pikëzimit për secilin kandidat”, thuhet në njoftimin zyrtar të KED.
Drejtësia e re, nën kontrollin e Fondacionit / Artur Metani, kandidati i Soros për ILD
Vendimi/ Kryeinspektori i Drejtësisë, KED shmangu ligjin në favor të Artur Metanit
