Sizmologu i njohur grek, Eftimis Lekas thotë se lëkundjet që po shënohen ditët e fundit në Rajon nuk përbejnë arsye për shqetësim.
Në një intervistë për televizionin “Klan”, ai shprehet se është normale që të ketë periudha me veprimtari të lartë sizmike dhe më vonë me veprimtari më të ulët.
“Kjo nuk është diçka e çuditshme. Hulumtuam në këtë drejtim mirëpo nuk nxorëm dot asnjë konkluzion. Është edhe ky një fenomen natyror që ndjek rregullat e veta. Mirëpo nuk rezulton asgjë që të themi se Ballkani dhe Italia dhe Mesdheu Lindor ndodhen në një situatë të rrezikshme. Këtë nuk mund ta themi”.
Sizmiolgu Lekas u gjend në Shqipëri që në momentin e parë të tërmetit të 26 Nëntorit. Ai thotë se tashmë aktiviteti sizmik po zhvillohet normalisht dhe sipas tij, kjo është diçka e mirë.
“Ka shumë pas tërmete dhe kjo është pozitive, sepse ç’tensionon aktivitetin sizmik. Mirëpo në asnjë rast s’mund të themi se s’do të bëhet një tërmet i fuqishëm. Kjo shkon për tej fuqive dhe njohurive tona. Megjithatë fakti që kemi vazhdimisht pas tërmete, është në drejtimin e duhur. Tërmeti nuk është gjë tjetër veçse energji. Sa më shumë energji çlirohet aq më pak mbetet. Kështu zvogëlohet edhe mundësia që të bëhet një termet i madh. Sa më shumë kalon koha dhe vazhdojnë pas tërmetet pakësohet dhe mundësia që të ndodhë një tërmet i fuqishëm”.
Por a zona të tjera në Shqipëri që rrezikohen nga një tërmet i fuqishëm?
“Këtë s’mund ta themi. Sa herë që themi diçka ndodh e kundërta. Nuk kemi ende njohuritë që ta themi ra tërmet në Durrës, tani do bjerë në Sarandë apo diku gjetkë. Kjo është mbi fuqitë tona. Natyra funksionon pa u kufizuar prej njeriut. Natyra na urdhëron. Nuk e urdhërojmë ne”.
Sizmiologu Eftimis Lekas vjen sërish në Shqipëri këtë fundjavë në krye të një ekipi me 20 inxhinierë grekë. Misioni do të jetë të shqyrtojë shkaqet e shembjes së godinave dhe paraqitja e konkluzioneve qeverisë shqiptare.
/Tv Klan/
