KED e cunguar shpall garën finale për Kryeinspektorin e Drejtësisë

Nga Boldnews.al

Këshilli i Emërimeve në Drejtësi, tashmë i mbetur me 6 anëtarë pas shkarkimit të Fatri Islamajt nga Komisioni i Vetingut, mblidhet paraditen e së Mërkurës për të shpallur fillimin e procedurës për vlerësimin, pikëzimin dhe renditjen e kandidatëve për Inspektor të Lartë të Drejtësisë.

Në përfundim të verifikimeve paraprake, KED ka kualifikuar për vijimin e garës 5 kandidatë, aq sa është numri i kërkuar nga Kushtetuta. Në procedurë për postin vakant për Inspektor të Lartë të Drejtësisë janë: Artur Metani, Eris Hysi, Joana Asimi Sorraj, Lindita Troja dhe Sokol Stojani.

Në një njoftim zyrtar, Këshilli i Emërimeve në Drejtësi informon se institucioni do të zhvillojë mbledhjen e radhës, në datë 11.12.2019, me rend dite:

1. Shpallja dhe fillimi i procedurës së vlerësimit, pikëzimit dhe të renditjes së kandidatëve për vendin vakant të Inspektorit të Lartë të Drejtësisë.

2. Miratimi i kalendarit të intervistave me kandidatët e lejuar për kandidim në vendin vakant të Inspektorit të Lartë të Drejtësisë.

3. Miratimi i ekspertëve të gjuhëve të huaja në funksion të realizimit të intervistave me kandidatët e lejuar për kandidim.

4. Relatimi për procedurën e ndjekur për vlerësimin, pikëzimin dhe renditjen e kandidaturave dhe zhvillimi i intervistave, sipas ligjit, me kandidatët e lejuar në vendin vakant të Inspektorit të Lartë të Drejtësisë, shpallur nga Këshilli i Emërimeve në Drejtësi.

Këshilli i Emërimeve në Drejtësi i vitit 2019 është në përfundim të mandatit një-vjeçar. KED ka funksionuar, që në fillim të tij, me 7 anëtarë nga 9 që duhet të ishin. Kjo, për faktin se, nga Prokuroria e Apelit, të cilës i takojnë dy anëtarë, kishte vetëm një zyrtar që plotësonte kriteret ligjore.

Po ashtu, një anëtar tjetër, Bashkim Dedja, ish-kryetar i Gjykatës Kushtetuese, u shkarkua nga procesi i Vetingut.

Ndërkohë, pak ditë më parë, Komisioni i Pavarur i Kualifikimit (KPK) shkarkoi një tjetër anëtar të KED-së, njëkohësisht gjyqtar në Apelin e Tiranës, Fatri Islamaj.

Në pikëpyetje është pjesëmarrja në mbledhjen e Këshillit të Emërimeve në Drejtësi të anëtares tjetër, ish-kryeprokurores së Përkohshme, Arta Marku, e cila nuk gëzon statusin e prokurores në Prokurorinë e Përgjithshme, pasi Kuvendi i Shqipërisë zgjodhi Olsian Çelën në krye të institucionit të Akuzës javën e kaluar.

Gjithësesi, procedurat për renditjen e kandidatëve për Inspektorin e Lartë të Drejtësisë, si edhe për plotësimin e vakancave të tjera në Gjykatën Kushtetuese, pritet të zhvillohen nga KED-2020, e shortuar pak ditë më parë në Presidencën e Republikës.

LEXO EDHE  Dokumenti/ Ja çfarë përmban marrëveshja mes pozitës dhe opozitës për zgjedhoren

Në shortin e zhvilluar nga administrata e Presidencës, në 5 Dhjetor 2019, u përzgjodhën si anëtarë të Këshillit të Emërimeve në Drejtësi për vitin 2010, magjistratët:

Ardian Dvorani njëkohësisht edhe kryetar i KED-së, u caktua pa short, për shkak se është i vetmi gjyqtar në Gjykatën e Lartë.

– Nga Gjykata Kushtetuese u përzgjodhën Vitore Tusha dhe gjyqtarja e sapo-emëruar, Fiona Papajorgji. Gjyqtarja Marsida Xhaferllari u përzgjodh si “anëtare zëvendësuese”

– Nga Prokuroria e Përgjithshme, shorti përzgjodhi Arta Markun. Për momentin, është e paqartë pjesëmarrja në Këshillin e Emërimeve në Drejtësi të Arta Markut, për shkak se ajo nuk gëzon statusin e prokurores së Prokurorisë së Përgjithshme, pas largimit nga zyra, mes-javën e kaluar. Shorti përzgjodhi edhe prokurorin Bilbil Mete si “anëtar zëvendësues”

– Nga Gjykatat e Apelit u përzgjodhën Miranda Andoni dhe Saida Dollani. Ndërsa, si “anëtar zëvendësues”, shorti zgjodhi Nazmi Trokën.

– Nga prokuroritë e Apelit, shorti i zhvilluar në Presidencë përzgjodhi Fatjona Memçajn, një ndër kandidatët për Prokuror të Përgjithshëm dhe gjithashtu anëtare e KED-së që po përfundon mandatin. Së bashku me Memçajn, shorti përzgjodhi si anëtar të KED-2010 edhe Ludovik Dodaj, ndërsa Nezir Gjoka është “anëtar zëvendësues”.

– Së fundi, nga Gjykatat Administrative, shorti përzgjodhi emrin e gjyqtarit Arjan Qafa, ndërsa si zëvendësues është Marjana Velçani (Idrizi), e cila po përballet këto ditë me procesin e Vetingut.

Nga 9 anëtarët e përzgjedhur me short, kanë kaluar procesin e Vetingut 6 prej tyre (Ardian Dvorani, Vitore Tusha, Fiona Papajorgji, Arta Marku, Saida Dollani dhe Fatjona Memçaj). Ndërkohë që pritet të dalin para Komisionit të Pavarur të Kualifikimit (KPK), 3 anëtarët e tjerë të shortuar; Miranda Andoni, Ludovik Dodaj dhe Arjan Qafa.

Ndërsa, nga 5 anëtarët zëvendësues, përveç Marjana Velçani (Idrizi), e cila përballet me KPK-në këtë të Mërkurë dhe Marsida Xhaferllarit, të cilës ia realizoi “vetingun” Këshilli i Emërimeve në Drejtësi, 3 të tjerët ende nuk janë përballur me rezultatet e rivlerësimit kalimtar.

Nga anëtarët zëvendësues të shortuar për në KED, presin të dalin para Këshillit të Emërimeve në Drejtësi; Bilbil Mete, Nazmi Troka dhe Nezir Gjoka.

Përfundon shorti, kush janë anëtarët e rinj të KED (VIDEO)