Nga Boldnews.al
Prokuroria e Tiranës kërkon dënimin e 4 personave, të konsideruar përgjegjës për cënimin e nderit të trafikantit të narkotikëve, Agron (Geron) Xhafaj, vëllai i ish-ministrit të Brendshëm Fatmir Xhafaj, nëpërmjet “kallëzimit të rremë”.
Dy prokurorët e çështjes, Kolë Hysenaj dhe Genc Qana, ndanin të njëjtin qëndrim për dënimin e tre prej të akuzuarve; 3.6 vjet dënim për shtetasin Albert Veliu; 3 vjet për “dëshmitarin e rremë”, Fredi Alizoti; dhe 1.6 vjet burgim, të konvertuar në 200 orë punë publike për gazetarin Jetmir Olldashi.
Prokurorët u paraqitën me qëndrime të ndryshme para gjykatës për formën e dënimit të ish-deputetit Ervin Salianji. Prokurori Hysenaj kërkoi që Salianji të vuante 1.6 vite burgim, ndërsa Qana mbështeti kërkesën që dënimi i ish-deputetit demokrat të konvertohej në shërbim prove.
Prokurorët Qana dhe Hysenaj deklaruan para gjykatës se të akuzuarit, në bashkëpunim me njëri-tjetrin, kanë krijuar rrethana, me anën e të cilave do të cënonim nderin e Agron (Geron) Xhafaj e, në këtë mënyrë, do të godisnin politikisht vëllain e tij, Fatmir Xhafaj, ministër i Brendshëm në momentin e publikimit të audio-regjistrimit Albert Veliu-Agron (Geron) Xhafaj.
Pretenca e prokurorëve Kolë Hysenaj e Genc Qana ishte konkluzioni i një hetimi të turpshëm, skandaloz, dhe, madje, edhe me natyrë kriminale, për shkak të fabrikimit të provave, fillimisht nga ish-prokurori i Krimeve të Rënda, i shkarkuar tashmë, Gentian Osmani, e vijuar më tej nga kolegët e tij në Prokurorinë e Tiranës.
“Boldnews.al” ka raportuar edhe më parë për manovrat e kryera nga Prokuroria për Krime të Rënda, e cila e mori e para dosjen nën hetim.
Nga të dhënat e dosjes hetimore, rezulton se, fillimisht prokurorët Gentian Osmani dhe Përparim Kulluri të Krimeve të Rënda, kanë shmangur nga hetimi tërësisht vëllain e Fatmir Xhafaj, duke hetuar që në krye të herës personat që i dhanë zë publikisht denoncimit të Albert Veliut.
Ky i fundit deklaroi se kishte regjistruar një bisedë me Agron (Geron) Xhafaj, ku diskutonin për trafikimin e një sasie narkotikësh drejt Italisë. Por, aktet hetimore, treguan se hetimi për dyshimet mbi Geronin ishte devijuar në veprime proceduriale kundër Albert Veliut.
Krahas Veliut, hetimi përfshiu edhe gazetarin Jetmir Olldashi, i cili i kishte siguruar pajisjen regjistruese, në kuadër të një emisioni investigativ, si edhe ish-deputetin demokrat, Ervin Salianji, i cili publikoi audio-regjistrimin.
Dosja hetimore, kryesisht e Krimeve të Rënda, mbi të cilën u mbështetën edhe prokurorët e Tiranës, kishte fakte të mjaftueshme për “manipulim” të provave nga Prokuroria, si edhe veprime jo-proceduriale për realizimin e ekspertizës audio, të cilat shkonin në favor të Agron (Geron) Xhafaj dhe, natyrisht, edhe vëllait të tij, Fatmir Xhafaj.
Gjithashtu, Prokuroria shmangu nga hetimi edhe disa zyrtarë policorë, në Fier e në Tiranë, të cilët rezultonin në përgjimet proceduriale duke trajtuar “dëshmitarin e rremë”, Fredi Alizoti, me para të thata, me pagesa për fjetje në hotele e transport me automjete, madje edhe private të funksionarëve të lartë të uniformave blu.
Hetimi, i nisur nga Osmani-Kulluri tek Krimet e Rënda e i vijuar tek Hysenaj-Qana tek prokuroria e Tirënës, duket se kishte vetëm një qëllim final-të ruante nderin e trafikantit Agron (Geron) Xhafaj, i cili, siç thuhet, po vuan dënimin në Itali për “pjesëmarrje në organizatë kriminale”.
Por, qëllimi kryesor i grupit të prokurorëve që kanë kaluar në duar rastin “Geron” duket se ka qenë “shërbimi” ndaj Fatmir Xhafaj, me shpresën se ky i fundit, i ashtuquajturi “babai i Reformës në Drejtësi”, do t’i ndihmojë në procesin e Vetingut.
Aktualisht, dy prokurorët e Krimeve të Rënda, Gentian Osmani dhe Përparim Kulluri janë shkarkuar nga Vetingu, pavarësisht se mund të kenë mbajtur shpresat tek “fjala e mirë” e Fatmir Xhafajt.
Ndërkohë, prokurorët Kolë Hysenaj dhe Genc Qana janë në pritje të rezultateve të Vetingut.
