Banesat e dëmtuara nga tërmeti i 26 nëntorit në Durrës po inspektohen nga ekspertë dhe inxhinierë izraelitë. Procesi i inspektimeve është ndjekur për disa momente edhe nga Kryeministri Edi Rama, i cili nuk ka kursyer komplimentet në drejtim të ekipeve nga izraeli, por edhe batutat me banorët e ndërtesave të inspektuara.
“Janë prishur muret por struktura shumë e qëndrueshme dhe do riparojmë dëmet në mure, muret janë si lëkura, dëmtohet por nuk krijon rrezik, në këmbë na mban skeleti jo lëkura. Ky kompleks është i rikuperueshëm, nuk ka kolona të dëmtuara, thjesht muraturë”, tha Rama teksa shihte nga afër banesat, me të cara të frikshme në mure dhe faqe të tjera muresh të rëna përtokë.
“Këta janë nga Izraeli dhe janë njësha, inxhinieri thotë që pas katastrofës duhet ta puthësh shtëpinë tende se ka qëndruar dhe ju ka mbrojtur”, i tha Rama gruas së shtëpisë, që ishte ende e trembur nga gjithë sa kaloi.
Ndërkohë që specialistët shohin përmes një aparature të posaçme gjithë kolonat e banesave.
“Kjo është kamera termike që tregon që kolonat janë të gjitha në rregull do hedhim përtokë vetëm muret”, tha Rama, duke marrë rolin edhe të inxhinierit.
“Shtëpia ju ka mbrojtur struktura është solide, shikojmë të çarat po nuk ka probleme, ka pasur shumë tundje, tani do bëjmë muret më të forta që të jenë më të qëndrueshme, tani jemi ne me ju, shtëpia ju mbrojti dhe zoti gjithashtu”, u shpreh një nga pjesëtarët e ekipit të ekspertëve izraelitë.
