Presidenti Ilir Meta nuk ka dekretuar ligjin për Rininë, i miratuar në Kuvend me votat e deputetëve të Rilindjes, por i kontestuar nga opozita e bashkuar, dhe vetë të rinjtë, apo organizata rinore. Presidenti nuk e ka dekretuar ligjin me argumentin se ai bie ndesh me Kushtetutën.
Ligji u miratua në Kuvend më 4 nëntor, ndërsa Ministria e Arsimit, shprehej se ai siguron pjesëmarrjen e të rinjve në vendimmarrje dhe mbështetjen financiare të programeve, projekteve dhe infrastrukturës rinore.
Ku ligj mundëson krijimin e strukturave konsultative në nivel qendror dhe vendor dhe garanton pjesëmarrjen e të rinjve në vendimmarrje.
Gjithashtu, “Ligji për Rininë” siguron financimin e programeve, projekteve dhe infrastrukturës rinore duke fuqizuar të rinjtë dhe nxitur aktivizimin rinor nëpërmjet punës dhe hapësirave rinore të sigurta.
Por kontestuesit e ligjit shprehen se drafti i miratuar lë tërësisht në harresë mbi 681 548 të rinj e të reja të moshës 15-29 vjeç, ose rreth 26% të popullsisë së Shqipërisë, për shkak sepse projekti nuk planifikon të kryejë asnjë investim për forcimin e të rinjve dhe krijimin e institucioneve dhe mekanizmave në mbështetje të tyre.
Në argumentet e dhëna kundër ligjit, thuhet se ai bie ndesh me Kushtetutën e Shqipërisë, aktet kryesore të OKB-së dhe të Këshillit të Evropës për të drejtat e njeriut.
Po kështu, thuhet se ligji vendos në mënyrë të pashpjegueshme kompetenca, të cilat duhet t’i kenë në kontroll vetë të rinjtë, në duart e Kryetarëve të Bashkive apo të Ministrit përgjegjës për Rininë.
Ligji është cilësuar si një tentativë për të vendosur nën kontrollin politik të qeverisë organizatat rinore të shoqërisë civile në nivel lokal dhe kombëtar, duke krijuar një precedent të rrezikshëm për shkeljen e parimeve bazë të demokracisë dhe funksionimit të organizatave rinore të shoqërisë civile në Shqipëri.
