Nga Boldnews.al
Arta Marku deklaroi se ishte “shumë e lumtur” që po i dorëzonte zyrën e Prokurorit të Përgjithshëm një “ish-shokut të klasës”, në ceremoninë e marrjes së detyrës së kreut të Akuzës nga Olsian Çela, paraditen e së Premtes.
Por, ky deklarim i ish-Kryeprokurores së Përkohshme, duket se ka nota të thella hipokrizie, referuar përplasjes ndërmjet të dyve rreth një vit më parë.
Olsian Çela ishte një ndër 10 prokurorët, të cilët debatuan me drejtuesen e Prokurorisë për Krime të Rënda, Donika Prela, për rastin “Shullazi”.
Pas debatit me tone të ashpra, Arta Marku zgjodhi të mbajë anën e mikeshës së saj, Prela, duke urdhëruar nisjen e inspektimit për prokurorët që nuk pranuan sugjerimin jo-ligjor të drejtueses së tyre.
Krahas nisjes së inspektimit, Arta Marku urdhëroi, gjithashtu në shkelje të ligjit, “transferimin” e 3 prej prokurorëve që u konsideruan më rebel në debatet me Donika Prelën.
Marku shfrytëzoi mungesën e Këshillit të Lartë të Prokurorisë, duke i marrë kompetencat këtij institucioni, i cili është i vetmi që ka tagrin ligjor për emërimet/transferimet/komandimet e prokurorëve.
Një prej të transferuarve ishte edhe Olsian Çela, për të cilin, Arta Marku firmosi urdhërin që e komandonte në Prokurorinë e Beratit.
Prokurori i Krimeve të Rënda të asaj kohe dhe që prej së Enjtes, Prokuror i Përgjithshëm, kundërshtoi në rrugë gjyqësore vendimin e Arta Markut për “transferimin” e tij në Berat.
Gjykata Administrative e Tiranës, pasi shqyrtoi rastin, konstatoi “pavlefshmërine absolute” të urdhërit të Arta Markut dhe urdhëroi rikthimin e Olsian Çelës në Prokurorinë për Krime të Rënda.
Vendimi i gjykatës u zbatua menjëherë nga Këshilli i Lartë i Prokurorisë, i cili ishte konstituuar pak para se gjykata të jepte vendim në favor të Çelës.
