Tre nga konviktet e Universitetit të Mjekësisë në kryeqytet kanë dalë të pabanueshme, nga inspektimi që është bërë pas tërmetit të 26 Nëntorit.
Studentë që akomodohen në këtë strukturë thanë për “Boldnews” se këtë të mërkurë u është komunikuar rezultati i inspektimit, që kryhet nga Instituti i Ndërtimit.
Atyre u është bërë e ditur se do të transferohen në struktura të tjera komoduese për studentë. “Na thanë që do të transferohemi te konviktet e Inxhinierisë së Ndërtimit te 21 Dhjetori”, u shpreh një student për Boldnews.
Qendrat studentore në kryeqytet kanë kaluar në varësi të Bashkisë së Tiranës, disa muaj më parë. Pikërisht në konviktet e Mjekësisë, u kryen punime disa muaj më parë.
Në Janar të këtij viti, kryetari i Bashkisë së Tiranës Erion Veliaj, gjatë inspektimit të punimeve, tha se, e gjitha bëhej me qëllim “ofrimin e kushteve sa më të mira për studentët e ardhur nga rrethet në Tiranë”.
“Si çdo gjë që Bashkia e Tiranës prek me dorë, sigurisht që edhe ato do të shkëlqejnë”, citohet Veliaj nga ATSH.
Fatin e konvikteve të Mjekësisë e kanë pasur edhe disa shkolla në kryeqytet. Shkollës 9-vjeçare “Emin Duraku”, e rikonstruktuar nga Bashkia Tiranë vetëm 3 vite më parë, dhe gjimnazi “Sami Frashëri“, rikontruktuar një vit më parë, u është vënë shiriti.
Dëmet në godinat e konvikteve të Mjekësisë në FOTOT më poshtë
