Tërmeti shkatërrimtar i 26 nëntorit la dëmtime në shumë ndërtesa, të cilat shumë prej tyre janë shpallur të pabanueshme, dhe disa është marrë vendimi për t’u shembur.
Dëmtime kanë pësuar jo vetëm banesat por edhe godinat institucionale. Në kryeqytet, pas gjimnazit “Sami Frashëri” ku është pezulluar mësimi nga MASH për shkak të dëmtimieve, edhe shkolla 9 vjeçare “Emin Duraku”, pas ekspertizës është rekomanduar që të pezullohet aktiviteti mësimor, raporton Boldnews.al.
Pas ekspertizës te kjo shkollë kanë konstatuar:
“Plasaritje të thella 45° në muret ndarëse, dëmtim i traut të katit të tretë shtesë (tek 9-vjeçarja), plasaritje të thella të suvasë në katin e tretë shtesë (tek 9-vjeçarja), dëmtim i parapetit në të gjithë godinën, shkëputje të shtesës nga objekti ekzistues (tek cikli i ulët). Bordi i shkollës dhe stafi pedagogjik kërkojnë vendosjen e shkallëve të emergjencës.”
Sipas ekspertizës, kjo godinë ka dëmtime në strukturë dhe të pezullohet aktiviteti mësimor deri sa të bëhen përforcimet e nevojshme dhe të kontrollohen të gjithë elementët konstruktivë pasi të hiqen suvatë, raporton Boldnews.al.
Shkolla 9-vjeçare “Emin Duraku” është rikonstruktuar nga bashkia e Tiranës në vitin 2016, ku në atë kohë kryebashkiaku Erion Veliaj deklaronte se është një shkollë e re më e madhe. Veliaj propagandonte se në shkollën “Emin Duraku” po bëhet rindërtimi i palestrës, si dhe vendosja e sistemit të aspirimit. Gjithashtu, është bërë funksional sistemi i ngrohjes, si dhe është riparuar i gjithë sistemi elektrik. Pjesë e investimeve në këtë shkollë kanë qenë edhe pjesët hidraulike, përfshi të gjitha tualetet në të gjitha katet e ndërtesës.
