Partia Demokratike, ka nisur mbledhjen e informacioneve për të zbuluar se përse qeveria dhe Bashkia e Krujës, heshtën dhe u bënë bashkëfajtorë për shembjen e dy pallateve në Thumanë në 26 nëntor ku humbën jetën 24 persona.
Me anë të një kërkesë zyrtare sekretari i Përgjithshëm i PD, Gazment Bardhi, i kërkon informacion kryeministrit Edi Rama dhe kreut të Bashkisë së Krujës, Artur Bushi, se përse heshtën dhe nuk u mor asnjë masë për tu ardhur në ndihmë banorëve të Thumanës pas tërmetit të 21 shtatorit, çka më pas rezultoi fatale në 26 nëntor.
Ja letra e Bardhit drejtuar Ramës dhe Bushit:
PD ka nisur mbledhjen e informacioneve për mosveprimin kriminal të Qeverisë dhe Bashkisë Krujë për dy pallatet e shembura nga tërmeti i datës 26 Nëntor 2019. Qeveria dhe Bashkia Krujë duhet të japë llogari për vdekjen e 24 qytetarëve në Thumanë.
Pas heshtjes së Qeverisë për pyetjet tona publike, Sekretari i Përgjithshëm i PD z. Gazment Bardhi, i drejtohet me kërkesë zyrtare për informacion Qeverisë dhe Bashkisë Krujë, për 5 çështjet e mëposhtme:
- Pas tërmetit të datës 21 Shtator 2019, a ka kërkuar zyrtarisht dhe a ka kryer Bashkia Krujë verifikimin e sigurisë dhe gjendjes së dy pallateve të shkatërruara në Thumanë nga tërmeti i datës 26 Nëntor 2019? Nëse po, ju lutem na vini në dispozicion dokumentin zyrtar që e provon këtë. A është informuar ose raportuar pranë Komitetit Ndërministror të Emergjencave Civile (KNEC) për gjendjen e këtyre pallateve?
- A u verifikuan dy pallatet në Thumanë pas tërmetit të 21 Shtatorit? Nëse po, kush janë ekspertët që u angazhuan dhe çfarë vlerësimi bënë ata? Lutemi një kopje të aktit të konstatimit/verifikimit të hartuar dhe nënshkruar prej tyre.
- A u lajmëruan banorët për gjetjet e ekspertimit/verifikimit?
- Nëse godinat ishin vlerësuar si të rrezikshme, çfarë masash u morën për strehimin e banorëve dhe ndalimin e hyrjes në ato banesa?
- Kush lejoi futjen e banorëve në pallatet e shembura në 26 Nëntor 2019 dhe mbi çfarë bazë u bë kjo?
