Alban Hoxha dhe Lorenc Trashi rrëfejnë frikën e tërmetit

Futbollistët e partizanit, portieri Alban Hoxha dhe mesfushori Lorenc Trashi kanë treguar se si e kanë përjetuar ata tërmetin e 26 nëntorit. Në intervistën për “Panorama Sport”, ata deklaruan që si të gjithë shqiptarët, tronditjet e tërmetit i kanë lënë pasoja dhe duke pasur frikë për familjet e tyre.

“E përjetova ashtu si gjithë populli shqiptar atë që ndodhi duke u gdhirë më 26 nëntor. Ishin momente shumë të vështira, ku mendohet vetëm për jetë njerëzish. Edhe unë kam lëvizur menjëherë nga shtëpia, pasi nuk mund të qëndroja në atë situatë. Djali u tremb shumë dhe qëndruam jashtë për orë të tëra”.

“Në ditët e para të stërvitjes nuk po përqendroheshim dot, sepse mendjen e ke te familja. Fakti që tërmetet vazhduan, ankthi shtohej edhe më shumë. Megjithatë, duke parë TV, duke kuptuar situatën post-tërmetit dhe ato që thonë ekspertët se nuk do të ketë më probleme, automatikisht jemi më të qetë dhe më të përqendruar te stërvitja. Kjo është pjesë e jetës sonë, pra do të vazhdojmë punën”. – thotë kapiteni i Partizanit.

Ndërsa Lorenc Trashi ka deklaruar:

“Të jem i sinqertë, personalisht e kam përjetuar shumë keq atë që ndodhi. Në tri-katër ditët e para nuk kam fjetur fare. Jemi shtyrë më tepër nëpër makina si gjithë të tjerët”.

“Pastaj menduam që të ishim bashkë me shokët e skuadrës dhe të qëndronim në hotelin ku grumbullohemi zakonisht në Tiranë. Kemi qëndruar të gjithë në kat të parë dhe duke qenë bashkë, e kalonim pak më mirë këtë situatë”, është shprehur gramshioti. Sipas tij, vizita që bëri me Hoxhën në Fushë-Krujë e lehtësoi shumë pas gjithë asaj tragjedie. “Jemi munduar të ndihmojmë sadopak ata njerëz që janë prekur nga tërmeti dhe nuk kanë ku të flenë pas asaj ngjarjeje që ndodhi. E kemi dhënë atë ndihmën tonë si lojtarë dhe klub i Partizanit”.

“Kishim edhe një detyrim tjetër, bashkë me Albanin, duke përfaqësuar Kombëtaren në atë vizitë që bëmë në FushëKrujë. Shkuam aty, pasi shumica e lojtarëve të Kombëtares luajnë jashtë, por ata kanë dhënë kontributin e tyre përmes llogarive bankare. I prekëm nga afër situatat dhe mund të them se ishte një ngjarje shumë e rëndë për çdo familje dhe me këtë rast shpreh ngushëllimet e mia për të gjitha familjet, që kanë humbur njerëzit e tyre të dashur. Kur shkuam në Fushë-Krujë dhe takuam disa fëmijë, kuptuam realitetin”.

LEXO EDHE  Kërkohej nga “big”-ët e Superiores, ja shifra që Skënderbeu përfitoi nga shitja e Jashanicës në Kosovë