Sistemi VAR që në fillesat e implementimit të tij ka hasur kritika për kontradiktat që krijon, herë për vijat imagjinare që krijohen në dhomën e VAR-it, për vonesën e lojës, për prishjen e emocioneve e me radhë.
Ndërsa në një intervistë për “Mirror”, presidenti i Uefa-s, Aleksandër Ceferin, deklaron se kurrë nuk ka qenë fans i VAR-it, por në këtë pikë e vetmja gjë që mund të bëjnë është përmirësimi i tij.
“Nëse ti ke një hundë të gjatë, atëherë ti je në pozicion jashtë loje këto ditë. Vijat imagjinare që ndërtohen gjithashtu janë shumë subjektive. Do të kemi një takim shumë shpejt me gjyqtarët e kampionateve dhe propozimi jonë është që të ketë një tolerancë prej 10-20 centimetrash. Në Angli gjyqtarët ka raste që nuk e shikojnë fare VAR-in, ndërkohë në Itali një rast mund të shkojë edhe deri në 30 minuta gjykim, është një rrëmujë e vërtetë”.
“Unë kurrë nuk kam qenë një fans për përdorimin e VAR-it. Anësorët nuk e përdorin më flamurin, ato vetëm presin, presin e presin. Lojtarët? Askush nuk feston nëse goli nuk është kontrolluar nga VAR-i, tifozët festojnë të gjithë dhe më pas ata heshtin si të kenë pësuar gol. Me shumë mundësi teknologjia do të jetë dhe në Euro 2020, pasi ekipet nuk mund të durojnë gabimet në kurrizin e tyre. Ajo që ne mund të bëjmë është vetëm përmirësimi dhe zhvillimi i përdorimit të tij’’, mbyll Ceferin.
