Më shumë se një javë pas tërmetit sjkatrrimtar të 26 nëntorit, ky i fundit është në qendër të vëmendjes së mediave ndërkombëtare, për shkak të pasojave tragjike që la për vendin. 51 humbën jetën, mijëra persona të pastrehë, dhe qindra ndërtesa të pabanueshme. Mediat e huaja kanë pasqyruar, që prej të martës, e cila rezultoi edhe ditë zie për vendin, çdo detaj nga lëkundja e fortë sizmike. Së fundmi, ka qenë televizoni gjerman ARD, i cili ndërsa ka analizuar fakteqësinë natyrore në Shqipëri, ka bërë edhe një përllogaritje të kostos që duhet për të rindërtuar banesat e shkatërruar, duke shtuar se kjo e fundit, është element sfidues për qeverinë. Shifra që parashikon ARD mund të arrijë në 1 miliard euro, shumë kjo e stërmadhe për kapacitetin që ka sot Shqipëria.
“Shifrat zyrtare nuk janë ende të disponueshme, por rindërtimi i zonave të prekura nga tërmeti do të jetë jo vetëm një sfidë njerëzore dhe teknike, por njëherësh edhe e kushtueshme. Ekspertët thonë se rindërtimi mund të kushtojë deri në një miliard euro. Shumë njerëz dhe kompani në Shqipëri dhe jashtë saj kanë dhuruar tashmë para. Deri më tani, janë mbledhur rreth 15 milion euro”
Më tej televizioni gjerman vë theksin tek Komiteti Kombëtar i Rindërtimit, i cili është ngritur nga qeveria për të grumbulluar, koordinuar dhe menaxhuar paratë e mbledhura, me qëllim përballimin e situatës. Por media shton më tej se korrupsioni në Shqipëri mbetet një problem i madh dhe për këtë duhet treguar transparencë me fondet e mbledhura, por edhe për shpenzimet që do kryhen në terren.
“Një komision i posaçëm duhet të kanalizojë këto para dhe të sigurojë transparencë, sepse korrupsioni është një problem i madh në Shqipëri. Qeveria ka bërë të ditur plane për ndërtimin e lagjeve të reja në Tiranë, Durrës dhe Kurbin. Në afat të shkurtër, do të ndërtohen deri në 5,000 apartamente, në planin afatgjatë edhe 10,000.”
Lëkundjet e forta sizmike të martën e kaluar pllakosën dhimbje në shumë familje, ku një pjesë e tyre u detyruan të përcillnin para kohe për në banesë të fundit familjaret dhe të afërmit, të cilët mbetën të vdekur poshtë rrënojave. Megjithëse ditët kalojnë problemet për familjet e prekura drejtpërdrejtë nga tërmeti përkeqësohen. Mijëra qytetarë kanë mbetur pa banesa, ndërsa nuk kanë asnjë alternativë strehimi. Në këto kushte, instancat përkatëse duhet të punojnë fort për tu kthyer sigurinë qytetarëve, të cilët si pasojë e tërmetit kanë humbur të gjitha shpresat.
