Nga Boldnews.al
Pas emërimit në Gjykatën Kushtetuese, Marsida Xhaferllari është tërhequr nga gara për postin e Inspektorit të Lartë të Drejtësisë.
Gjithashtu, nga kandidimi për Kryeinspektor të Drejtësisë është tërhequr edhe juristi Klodian Rado, ndërkohë që ish-gjyqtarit të Apelit Administrativ, Artur Malaj, i është ndaluar kandidimi, pasi ai u shkarkua pak javë më parë nga Kolegji i Posaçëm i Apelimit, në përfundim të procesit të Vetingut.
Këto të dhëna bëhen publike zyrtarisht nga Këshilli i Emërimeve në Drejtësi, në përfundim të mbledhjes së zhvilluar mesditën e së Hënës, datë 2 Dhjetor 2019.
Sipas njoftimit zyrtar të Këshillit të Emërimeve në Drejtësi, ky institucion ka zhvilluar këtë fillim-jave mbledhjen për “Shqyrtimin e rasteve për gjetjet e deritanishme, në procedurën e verifikimit të kandidatëve për vendin vakant për Inspektor të Lartë të Drejtësisë”, si më poshtë:
1. Artur Malaj
2. Joana Asimi Sorraj
3. Klodian Rado
4. Lindita Troja
5. Marsida Xhaferllari
6. Sokol Stojani
Në përfundim të diskutimit të çështjeve të rendit të ditës, Këshilli vendosi:
1. Ndalimin e procedurës së vlerësimit, pikëzimit dhe renditjes së kandidaturës së z. Artur Malaj për vendin vakant për Inspektor të Lartë të Drejtësisë, të shpallur nga Këshilli i Emërimeve në Drejtësi në datën 01.03.2019;
Shfuqizimin e vendimit nr. 69, dt. 24.07.2019 të Këshillit të Emërimeve në Drejtësi “Për lejimin e kandidimit të kandidatit Artur Malaj, në vendin vakant për Inspektor të Lartë të Drejtësisë”, të shpallur nga Këshilli i Emërimeve në Drejtësi në datën 01.03.2019;
Ndalimin e kandidimit të kandidatit Artur Malaj në vendin vakant për Inspektor të Lartë të Drejtësisë, shpallur nga Këshilli i Emërimeve në Drejtësi në datën 01.03.2019.
2. Lejimin e kandidimit të kandidates Joana Asimi Qorraj, në vendin vakant për Inspektor të Lartë të Drejtësisë, të shpallur nga Këshilli i Emërimeve në Drejtësi në dt. 01.03.2019 dhe rishpallur në dt. 09.09.2019;
3. Përfundimin e procedurës së verifikimit, vlerësimit, pikëzimit dhe renditjes së kandidaturës së z. Klodian Rado, për shkak të tërheqjes nga kandidimi, për vendin vakant për Inspektor të Lartë të Drejtësisë, të shpallur nga Këshilli i Emërimeve në Drejtësi në dt. 01.03.2019 dhe rishpallur në dt. 09.09.2019;
4. Lejimin e kandidimit të kandidates Lindita Troja, në vendin vakant për Inspektor të Lartë të Drejtësisë, të shpallur nga Këshilli i Emërimeve në Drejtësi në dt. 01.03.2019 dhe rishpallur në dt. 09.09.2019;
5. Përfundimin e procedurës së verifikimit, vlerësimit, pikëzimit dhe renditjes së kandidaturës së z. Marsida Xhaferllari, për shkak të tërheqjes nga kandidimi, për vendin vakant për Inspektor të Lartë të Drejtësisë, të shpallur nga Këshilli i Emërimeve në Drejtësi në dt. 01.03.2019;
6. Lejimin e kandidimit të kandidatit Sokol Stojani, në vendin vakant për Inspektor të Lartë të Drejtësisë, të shpallur nga Këshilli i Emërimeve në Drejtësi në dt. 01.03.2019 dhe rishpallur në dt. 09.09.2019.
Pas vendimeve të së Hënës, kandidatët e lejuar së fundmi do i bashkohen listës së kandidatëve të miratuar më parë. Në përfundim të procesit të zhvilluar nga Këshilli i Emërimeve në Drejtësi, kandidatët e lejuar për të vijuar garën për Inspektor të Lartë të Drejtësisë janë:
1. Artur Metani
2. Eris Hysi
3. Joana Asimi Qorraj
4. Lindita Troja
5. Sokol Stojani
Në këtë mënyrë, Këshilli i Emërimeve në Drejtësi arriti të sigurojë numrin e nevojshëm kushtetues prej 5 kandidatësh, të cilët garojnë për Inspektor të Lartë të Drejtësisë.
Në vijim, Këshilli i Emërimeve në Drejtësi pritet të vendosë për pikëzimin dhe renditjen e kandidatëve në garë.
Më pas, lista së bashku me pikët përkatëse i dërgohet Kuvendit të Shqipërisë, i cili duhet të zgjedhë Kryeinspektorin e Drejtësisë me shumicë të cilësuar prej 84 votash. Në rast se Kuvendi nuk e siguron numrin e nevojshëm të votave, atëherë zgjidhet automatikisht kandidati që është renditur i pari në listën e Këshillit të Emërimeve në Drejtësi.
Inspektori i Lartë i Drejtësisë është një institucion i ri, i parashikuar në Reformën në Drejtësi dhe që është përgjegjës për inspektimin periodik të të gjithë gjyqtarëve dhe prokurorëve të Republikës së Shqipërisë.
DENONCO