Një përleshje e armatosur mes policisë meksikane dhe narkotrafikantët, pranë kufirit me Teksasin, ka përfunduar me dhjetëra viktima dhe të plagosur nga të dyja palët.
Pjesëtarët e një karteli droge hynë me kamionë në qytetin e Villa Union dhe sulmuan me artileri të rëndë zyrat qeveritare. Forcat e policisë iu përgjigjën të shtënave dhe si pasojë e përleshjeve 14 persona humbën jetën, 4 prej të cilëve efektivë policie.
Mediat lokale raportojnë se ngjarja ka ndodhur në mesditë në Villa Union dhe se mes viktimave dyshohet të ketë dhe 3 civilë. 6 oficerë të plagosur u dërguan në spital dhe ndodhen jashtë rrezikut për jetën.
Autoritetet lokale konfirmojnë se narkotrafikantët përdorën gjatë sulmit 12 kamionë dhe armë me kalibër të ndryshëm. Sulmi ndodhi pas deklaratës së disa ditëve më parë të presidentit Andres Manuel Lopez Obrador, i cili tha se nuk do të lejonte SHBA të ndërmerrte operacione të armatosura ndërkufitare kundër karteleve të drogës në Meksikë.
