Ardit Gjebrea e ka nisur “Të Dielën shqiptare”, me një fjalim shumë prekës. Me sytë me lot, Gjebrea tha se gjëja e vetme që kemi në dorë është dashuria. Moderatori e krahasoi tokën me një aeroport dhe njeriun me një valixhe që nuk dihet ku e ka destinacionin.
“Kanë kaluar vetëm pak ditë nga goditja e natyrës në Detin Adriatik ku shkaktoi një nga tragjeditë më të rënda në historinë tonë. Unë nuk dua të shtoj as ankthin, as dëshpërimin, por dua të ndaj dy fjalë zemre me ju. Ne jemi një valixhe frymuese në botë. Na zbritën në këtë aeroportin e madh që quhet Tokë dhe fillojmë të rrugëtojmë si valixhe, diku stacionohemi, diku jemi transit, na marrin, na hedhin, na paketojnë, na ambalazhojnë, na etiketojnë, na peshojnë, ama e di nuk e shmangim dot, ne kemi një destinacion final. Njësoj si një valixhe! Ne nuk kemi në dorë aeroportin, tranzitin, kur dhe ku e kemi biletën. Por ne kemi në dorë shumë! Kemi dashurinë! Ne nuk kemi në dorë humorin e natyrës, as reagimin e saj ndaj nesh! Ne kemi në dorë vetëm dashurinë! A e dini që ne kemi probleme me peshoren e jetës? Nuk kemi një njësi matëse të saktë. Peshorja e jetës ka një defekt të rëndë, memorien. Sa shpejt harron! Sa pak peshon në ditë me diell, sa shumë rëndon në ditë me shi. Bëni gjithçka, çdo gjë që dëshironi, por sigurohuni që aty brenda të ketë dashuri. Le të harrojmë çdo ngjarje që dhemb, por mos të harrojmë dashurinë. Ne këtë e kemi në dorë. Nuk e dimë çfarë do ndodhë nesër. Shih me dashuri atë që ke afër! A themi bashkë të dua? Ta themi! Të dua! Sepse ne kemi në dorë të vetmen, dashurinë!”, u shpreh Gjebrea.
