Tërmeti i të martës së 26 nëntorit, përpos humbjes së jetëve të 50 qytetarëve dhe dëmëve të mëdha që shkaktoi, ka prodhur një debat të madh në vend mbi katrahurën e ndërtimeve dhe kaosin urbanistik të këtyre tre dekadave. Kjo vë në dyshime të mëdha cilësinë e ndërtimeve dhe objektet e ndërtuara gjatë kësaj kohe të konsideruara si jashtë kushteve teknike dhe jashtë kritereve inxhinierike.
Një mendim të tillë ka dhe ish-deputeti dhe bisnesmeni Eduart Ndocaj, aktiviteti i të cilit shtrihet kryesisht në fushën e ndërtimeve, i cili ka hedhur akuza të rënda mbi cilësinë e ndërimeve dhe kriteret që ndiqen nga investitorët.
Ndocaj ka kërkuar marrjen e masave të mënjeherëshme në këtë drejtim, me qëllim evitimin e të tjerave tragjedive, siç ishte kjo e tërmetit të para pak ditëve.
Duke folur gjatë për këtë temë, Ndocaj, ka vënë theksin tek roli i shtetit dhe i strukturave përgjegjëse, të cilat sa i takon zbatimit të kuadrit ligjor në fushën e ndërtimeve, janë treguar sa të paafta aq dhe të korruptuara, pasi kanë toleruar fenomene nga më të çuditshme, gjë që sipas tij ka çuar në instalimin e një oligarkie ndërtuese që ka zotëruar në kthetrat e saj çdo pëllëmbë tokë dhe që nuk pyesin për ligjin, kushtet dhe kriteret ndërtuese.
Biznesmeni, ka apeluar për forcim të ligjit urbanistik, si dhe për kritere të qarta dhe të rrepta, të cilat do të conin në një cilësi më të lartë investimet e kryera.
https://www.facebook.com/EduartNdocaj/videos/2464514330322753/
