Premier League luan sot javën e 14-të të saj, ku në fushë zbresin kryesuesit e Liverpool, Manchester City dhe Tottenham.
Liverpool pret në shtëpi Brighton, dhe vjen pas një ecurie fantastike ku do të kërkojë fitoren e pestë radhazi dhe për të konsoliduar edhe më tej vendin e parë.
Lajmi i keq për të besuarit e Jurgen Klopp është se do të duhet të bëjnë pa mesfushorin Fabinho, i cili ka pësuar një dëmtim dhe do të mungojë për më shumë se një muaj.
Ndërkohë nga ana tjetër Manchester City luan në transfertë ndaj Newcastle, ku fitorja është e detyruar, pasi një hap tjetër fals pothuajse do ti “vriste” shanset për të mbrojtur titullin, duke marrë parasysh formën e Liverpool.
Tottenham i drejtuar nga Jose Mourinho, sfidon Bournemouth në shtëpi dhe do të kërkojë të ruajë formën e mirë pas ardhjes së trajnerit portugez në stol i cili ka arritur të fitojë në sfidën e kampionatit ndaj West Ham dhe të përmbysë Olympiakos në Ligën e Kampioneve.
Skuadra tjetër nga Londra, Chelsea, pas humbjes ndaj City-t të Guardiolës, kërkon rikthimin te fitorja përballë West Hamit.
