Bukureshti do të presë sot në darkë shortin e fazës në grupe të Euro 2020, aktivitetit cili pritet të angazhojë të gjithë kontinentin me formulën e tij të veçantë udhëtuese në verën e ardhshme, ku do të luhet në 12 qytete e shtete të ndryshme.
Skuadrat pjesëmarrëse janë ndarë në katër vazo në bazë të pikëve të grumbulluara gjatë fazës kualifikuese, në varësi të pikëve dhe ecurisë së tyre në Ligën e Kombeve.
Me dhjetë fitoret e fazës së grupeve, Italia është kokë grupi, ashtu si edhe Gjermania, Anglia dhe Belgjika. Në Europian do të jetë edhe Portugalia e Cristiano Ronaldos, që do të tentojë të mbrojë kurorën e fituar 4 vite më parë. Në kompeticion do të jetë edhe Holanda, e cila nuk pati marrë pjesë as në Botërorin e fundit e as në Europianin francez.
Historike do të jetë edhe pjesëmarrja e Finlandës, e cila merr pjesë për herë të parë në kompeticionin kontinental. Kushtet gjeografike të ndarjeve në grupe kanë bërë të ditur një pjesë të përbërjes së tyre. Por gjithsesi, do të nevojitet shorti i sotëm për të përcaktuar ekipet e mbetura.
Në Europian do të marrin pjesë 24 ekipe kombëtare dhe aktualisht njihen vetëm 20 prej tyre. Katër ekipet e fundit do të njihen më 31 mars, pasi të jenë luajtur balotazhet e përcaktuara nga edicioni i fundit i Ligës së Kombeve. Ekipet do të ndahen në gjashtë grupe me nga katër skuadra, teksa në fazën pasardhëse do të kualifikohen dy të parat e çdo grupi dhe katër skuadrat e renditura të treta, por që kanë pasur një ecuri më të mirë se simotrat e tyre në grupet e tjera.
