Ish-Kryeministri Sali Berisha përmes një postimi në rrjet ka reaguar lidhur me Ditën e Flamurit, si dhe mbi tragjedinë që përfshiu vendin, si pasojë e tërmetit të dy ditëve më parë.
“Duke ndarë festën nga dhimbja dhe morti, le të shprehim ne edhe njëherë sot ngushëllimet tona me të ndjera familjeve të viktimave, të lutemi që shpirti i njerëzve të tyre të shtrenjtë të gjejë paqen e merituar, le t’ju urojmë nga zemra shpëtim atyre që po luftojnë me vdekjen nën gërmadha dhe shërim të plotë të plagosurve nga tërmeti”, shkruan Berisha në rrjet.
Postimi nga Sali Berisha
28 nëntori i vitit 1912 është ditëlindja e re moderne e kombit tonë, ditë që ne nderojmë Flamurin tonë kombëtar, Ismail bej Vlorën dhe etërit e tjerë të Pavarësisë, nderojmë të rënët tanë të të gjithë kohërave, që ranë për pavarësinë dhe lirinë e kombit tonë.
Duke u përulur me nderimin më të thellë para të gjithë atyre që bënë të mundur këtë ditë, ju uroj shqiptarëve gëzuar këtë ditë dhe i uroj Shqipërisë dhe mbarë kombit tonë, përjetësi, zhvillim dhe begati.
Por ne kjo festë na gjen pasi një tërmet i fortë mori 40 jetë dhe disa vëllezër e motra janë ende nën gërmadhat e ndërtesave të rrënuara dhe qindra qytetarë të tjerë mbetën të plagosur.
Prandaj miq, duke ndarë festën nga dhimbja dhe morti, le të shprehim ne edhe njëherë sot ngushëllimet tona me të ndjera familjeve të viktimave, të lutemi që shpirti i njerëzve të tyre të shtrenjtë të gjejë paqen e merituar, le t’ju urojmë nga zemra shpëtim atyre që po luftojnë me vdekjen nën gërmadha dhe shërim të plotë të plagosurve nga tërmeti.
