Tërmetet duket se s’kanë të ndalur në Shqipëri. Një ditë më parë, lëkundja sizmike prej 6.4 Rihter ka shkaktuar deri më tani 30 viktima si dhe dëme të shumta materiale. Rreth dy orë më parë, një tjetër tërmet 5.3 i shkallës Rihter goditi sërish vendin, duke frikësuar sërish banorët të cilët kanë braktisur menjëherë ambientet e banimit.
***
Nga Boldnews.al
Nga lëkundja e fundit sizmike, një pallat në zemër të kryeqytetit duket se rrezikon jetën e banorëve pasi është anuar dhe është krisur, raportojnë vetë qytetarët. Siç shihet në pamjet më poshtë, pallati 10 katësh është i boshatisur prej banorëve. Ai ndodhet përballë xhamisë ‘Dine Hoxha’ në “Rrugën e Kavajës”.
Në një prononcim për Boldnews.al, një zonjë rreth të 50-tave u shpreh se tërmeti i fundit i frikësoi tej mase duke i bërë të braktisin banesat sërish. Më tej ajo deklaroi se pronari i pallatit, Astrit Veliaj, ka bërë dy kate shtesë mbi pallat si dhe shtesa anësore nga fillimi në fund. Katet shtesë, janë jashtë standardit, pasi pallati nuk i mban për shkak të punimeve të dobëta, deklaroi zonja.
“Ndërtimi është i dobët. Pronari ka bërë dhe shtesa mbi pallat. Në pallatin ngjitur që është më i vogël, pronari iu ka dhënë shtesat e pallatit të tij banorëve, në favor që të ndërtonte këtë pallat ngjitur me një më të vogël. Banorët nuk donin që pallati në pronësi të Veliajt të ndërtohej, por pasi ai iu dha shtesat e pallatit të tij në favor, ata e pranuar që ai të ndërtonte ngjitur. Pra, pa hapësirë nga pallati në pallat.”-deklaroi zonja.
Më tej, një tjetër banor u shpreh se natën e kanë kaluar jashtë shtëpisë nga frika, sidomos pas lëkundjeve së fundit prej 5.3 të shkallës rihter, që sipas banorëve, i dha krisjen pallatit në zemër të qytetit, do ta kalojnë sërish natën jashtë.
Banorët në panik, theksin kryesor e vendosin mbi përgjegjësitë që ka pronari i pallatit Astrit Veliaj, i cili ka bërë shtesa, të cilat janë jashtë standardit të pallatit, mbi të gjitha dy kate i ka shtuar mbi pallat. Ajo çka bën përshtypje nga një vështrim në vendngjarje, forcat e policisë nuk duket gjëkundi.
Kujtojmë se Astrit Veliaj ka qënë deputet i listës së Partisë Demokratike dhe është kushëriri i afërt i kryebashkiakut Erion Veliaj./Boldnews.al/
