Kandidati për kryeministër i Kosovës dhe njëkohësisht kryetari i Lëvizjes Vetëvendosje Albin Kurti u solidarizua me qeverinë dhe qytetarët shqiptarë për përballimin e pasojave të tërmetit frikshëm të mëngjesit të së martës, i cili deri tani ka shkaktuar 29 viktima.
Në një postim për ”Twitter”, Kurti shton se populli i Kosovës po mobilizohet për të dhënë ndihmë vullnetare për qytetarët e Shqipërisë.
”I trishtuar për pamjet tragjike të tërmeteve në Shqipëri. Kohë të tilla forcojnë lidhjen e ndjeshmërisë për njëri-tjetërin. Populli i Kosovës po mobilizohet për të dhënë ndihmë vullnetare. Kurajoja dhe forca rriten së bashku. Vajtojmë së bashku me familjet e viktimat.”, shkruan Kurti.
Ndërkohë pak më herët zv/kryeministri i Kosovës Behgjet Pacolli komunikoi se qeveria e Kosovës është gati të sistemojë 200 familje të prekura nga tërmeti. Ndërkohë, qeveria Haradinaj e shpalli ditën e sotme ”Ditë Zie Kombëtare”, ndërsa u dhanë 500 mijë euro ndihmë nga qeveria e Kosovës.
