Ditën e djeshme u zhvilluan tetë ndeshje të vlefshme për raundin e pestë të ndeshjeve të grupit, ku skuadrat e mëdha si: Real Madrid, PSG, Bayern Munich, Juventus, Tottenham, siguruan kualifikimin për në raundin tjetër.
Ditën e sotme luhen dhe ndeshjet e fundit për raundin e pestë të ndeshjeve të grupit. Takimet që spikasin janë ato mes Slavias së Pragës ndaj Interit,dhe Barcelonës ndaj Borussia Dortmund.
Interi ka një ndeshje shumë të rëndësishme në transfertën ndaj Slavias së Pragës , ku rezultati i vetëm që zikaltrit kërkojnë është fitorja, pasi gjendet në grupin F, aty ku bëjnë pjesë dhe Barcelona dhe Dortmundi.
Interi gjendet në vendin e tretë me 4 pikë të grumbulluara, ndërsa grupi kryesohet nga Barcelona me 8 pikë e ndjekur nga Dortmund me 7 pikë. Një situatë e komplikuar kjo për skuadrën zikaltër duke marrë parasysh që ndeshjen e fundit të grupit e zhvillojnë ndaj Barcelonës në “Camp Nou”.
Ndeshja mes Barcelonës dhe Dortmundit, mund të vendosë gjithçka, që nga vendi i parë në grup por edhe fatet e skuadrës së Interit.
Një fitore e skuadrës “blaugranase”, siguron kualifikimin si “koka” e grupit, dhe e njëjta gjë mund të thuhet për Borussia Dortmund duke pasur parasysh se ndeshjen e fundit e ka relativisht të lehtë ndaj Slavia Pragës.
