Nga Boldnews.al
Dhjetëra viktima, mbi 600 të plagosur dhe shumë persona ende nën rrënoja është bilanci tragjik deri më tani në vendin tonë, pas goditjes së fortë të tërmetit. Durrësi, Laçi dhe Mamurrasi janë tre zonat që kanë pësuar dëmtimet më të shumta, ku flitet për familje që janë ende nën rrëmoja, ndërsa deri në këto momente dhjetë persona zyrtarisht konfirmohen të vdekur.
Në situatën aktuale është e pakuptueshme se përse nuk shpallet “gjendja e emergjensë” (e jashtëzakonshme), nga ana e qeverisë dhe Parlamentit. Në pikën tre të ligjit për funksionimin e “Emergjencave Civile” thuhet shprehimisht se: “Fatkeqësi natyrore kuptohen tërmetet, përmbytjet, thatësira atmosferike të tejzgjatura, rrëshqitjet arkitektonike, ortekët, erërat e forta, zjarret në pyje dhe në mjediset e banuara, sëmundjet infektive masive, pasojat e të cilave prekin popullatën, gjënë e gjallë, pronën, mjedisin, si dhe ngjarje të tjera të shkaktuara nga dukuri natyrore”.
Jemi para faktit se tërmeti ka shkaktuar pasoja të rënda mbi popullatë, ndaj është e nevojshme shpallja e menjëhershme e gjendjes së jashtëzakonshme, por edhe në këtë pikë, për fatin e keq, strukturat shtetërore mund të mendojnë për të mos shpenzuar në të ardhmen.
Nëse qeveria e shpall gjendjen e emergjencës, ligji e imponon një dëmshpërblim në masën 100 përqind të çdo dëmi që prek popullatën. Më konkretisht, në pikën 11 të ligjit thuhet se:
“Riaftësim kuptohen masat dhe veprimet që kryhen për rikthimin në gjendjen e mëparshme në rajonin (territorin) e prekur nga fatkeqësia. ‘Rrezik’ kuptohet një gjendje serioze, reale dhe e menjëhershme, që kanos jetën e njerëzve, të gjësë së gjallë, dëmtimin e pronës publike, të trashëgimisë kulturore dhe të mjedisit, që mund të shkaktohet nga fatkeqësitë natyrore ose nga fatkeqësitë e tjera”.
Në të vërtetë shpallja e gjendjes së jashtëzakonshme për këtë fatkeqësi natyrore duhet të ndodhte menjëherë në orët e para të mëngjesit, pas bilancit tragjik dhe pasojave të rënda që ka lënë lëkundja e fortë e tërmetit. Me kërkesë të qeverisë është Parlamenti që që mblidhet urgjent dhe vendos për tu shpallur gjendja e jashtëzakonshme e emergjencës civile, por deri më tani nuk ka asnjë kërkesë nga strukturat qeveritare.
Në një situatë të tillë shpallja e gjendjes së jashtëzakonshme do i jepte mundësi të gjithë strukturave qeveritare dhe private që të kenë detyrimin të angazhohen në përballimin e situatës së rëndë. Është e vërtetë që forcat zjarrfikëse, të policisë së rendit, të ushtrisë dhe grupe mjekësh janë në terren për të bërë gjithçka të mundur shpëtimin sa më shumë të jetëve të njerëzve, por nevojitet edhe më shumë.
